सोलापूर : रेल्वे प्रवासाला सुरक्षित, सुगम आणि आरामदायी बनवण्यासाठी मध्य रेल्वे प्रशासनाने विनातिकीट प्रवासावर नियंत्रण ठेवण्यासाठी आपल्या प्रयत्नांना अधिक वेग दिला आहे. याच अनुषंगाने, रेल्वे विभागाने विनातिकीट प्रवास करणाऱ्या फुकट्या प्रवाशांना मोठा चाप दिला आहे.
यामध्ये सोलापूर विभागाने उल्लेखनीय कामगिरी केली आहे. 2025-26 या आर्थिक वर्षातील (एप्रिल ते ऑक्टोबर 2025) या सात महिन्यांच्या काळात, 1 लाख 41 हजार अनधिकृत आणि विनातिकीट प्रवास करणाऱ्या प्रवाशांकडून दंड म्हणून तब्बल 6 कोटी 72 लाखांची विक्रमी वसुली करण्यात आली आहे. सोलापूर विभागाने सुव्यवस्थित आणि सखोल तिकीट तपासणी मोहिमेद्वारे हे यश मिळवले आहे. ही कारवाई रेल्वे नेटवर्कमध्ये सुव्यवस्था राखण्यासाठी आणि महसूल वाढवण्यासाठी रेल्वे प्रशासन कटिबद्ध असल्याचे पहायला मिळत आहे.
सोलापूर विभागाने विनातिकीट प्रवाशांवर कारवाई केली आहे. 2025-26 या आर्थिक वर्षात (एप्रिल ते ऑक्टोबर) 1 लाख 41 हजार अनधिकृत प्रवाशांकडून दंड म्हणून तब्बल 6 कोटी 72 लाखांची वसुली केली आहे.
प्रवाशांच्या तक्रारींवर त्वरित प्रतिसाद देण्यासाठी रेल्वे विभागाने 24 तास कार्यरत असलेले एक विशेष पथक नेमले आहे. या पथकाशी संपर्क साधण्यासाठी व्हॉट्सॲप तक्रार क्रमांक 7208819987 उपलब्ध करून देण्यात आला आहे. या सुविधेमुळे प्रवाशांना त्यांच्या समस्यांवर तातडीने उपाय मिळण्यास मदत होणार आहे.
अनधिकृत प्रवासी ओळखण्यासाठी मध्य रेल्वेने बहुआयामी धोरण स्वीकारले आहे. यात स्टेशन तपासणी, सापळा तपासणी, किल्ला तपासणी, तसेच व्यापक आणि भव्य तिकीट तपासणी मोहिमांचा समावेश आहे. या धोरणांमुळे विनातिकीट प्रवाशांना चाप बसत आहे.
