पोखरापूर : १३ वर्षीय शाळकरी मुलगा गावातील घराकडून शेताकडे ट्रॅक्टर घेऊन जात असताना चरीच्या खड्ड्यात ट्रॅक्टर पलटी झाला. या घटनेत पाण्यात गुदमरून मुलाचा मृत्यू झाल्याची घटना दि. ५ जानेवारी रोजी सायंकाळी ४ वाजता घडली. ही घटना मोहोळ तालुक्यातील घाटणे गावच्या शिवारात घडली. स्वराज मनोज देशमुख असे मृत मुलाचे नाव आहे.
याबाबत मोहोळ पोलिसांनी दिलेल्या माहितीनुसार, मोहोळ तालुक्यातील घाटणे येथे मनोज हणमंत देशमुख हे त्याच्या कुटुंब समवेत राहून शेती करतात. त्यांचा मुलगा स्वराज हा ७ वी मध्ये शिकत आहे. रविवारी सायंकाळी ४ वा.चे. सुमारास मनोज देशमुख यांनी त्यांच्या घराचे समोर त्यांचा ट्रॅक्टर क्र.एम.एच.१३/डी.टी.०२४३ हा उभा करून जेवण करीत असताना, मुलगा स्वराज याने सदर ट्रॅक्टर चालू करून शेताकडे निघाला.
गावाच्या लगत असलेल्या पाणी पुरवठा विहीरीच्या शेजारी रोडलगत असलेल्या चरीत ट्रॅक्टर वेगात असल्याने खडयात पलटी झाला. त्यात स्वराज देशमुख हा ट्रॅक्टरसह पाण्यात पडल्याने गंभीर जखमी झाला. त्याला बाहेर काढून मोहोळ येथील ग्रामीण रुग्णालयात उपचारासाठी आणले असता उपचारापुर्वीच स्वराज्यचा मृत्यू झाल्याचे डॉक्टरांनी सांगितले. या अपघाताप्रकरणी मोहोळ पोलीस ठाण्यात नोंद करण्यात आली असून याबाबतची फिर्याद विश्वास जालींदर गायकवाड यांनी दिली आहे. अधिक तपास मोहोळ पोलीस ठाण्याचा अपघात विभाग करत आहे. या घटनेने घाटणे गावात हळहळ व्यक्त केली जात आहे.
