पंढरपूर : ग्रीष्मऋतूतील वाढत्या उन्हापासून श्री विठुरायाला शीतलता मिळावी, यासाठी दरवर्षी चैत्र पाडव्यापासून मृग नक्षत्राने पावसाळ्याची सुरुवात होईपर्यंत दररोज दुपारी चंदनउटी पूजेची परंपरा आहे. त्यानुसार यंदाच्या या पूजेला गुढीपाडव्यापासून सुरुवात करण्यात आली होती. तर दि. 13 जून रोजी सांगता करण्यात आली. पुजेची सांगता मंदिर समितीचे सदस्य व अधिकार्यांच्या हस्ते करण्यात आली. चंदनउटी पुजेतून मंदिर समितीला 35 लाख रुपयांचे उत्पन्न मिळाले आहे.
श्री विठ्ठलाला उन्हाचा त्रास होऊ नये, त्याची तीव्रता कमी व्हावी, थंडावा मिळावा. या भावनेतून चंदनउटी पूजा केली जाते. विठुरायाप्रमाणे रुक्मिणीमातेलाही या पद्धतीने चंदन उटी लावण्यात येते. या चंदनउटी पुजेची शुक्रवार, दि. 13 जून रोजी सांगता पूजा झाली. श्री विठ्ठल व श्री रूक्मिणीमातेची चंदनउटी पुजा सदस्या अॅड. माधवीताई निगडे व कार्यकारी अधिकारी राजेंद्र शेळके तसेच सदस्य ह.भ.प. ज्ञानेश्वर देशमुख व व्यवस्थापक मनोज श्रोत्री यांच्या हस्ते झाली. यावेळी सदस्या शकुंतला नडगिरे, विभाग प्रमुख पांडुरंग बुरांडे, सहायक विभाग प्रमुख संदीप कुलकर्णी, पांडुरंग दशपुत्रे आदी उपस्थित होते.
यंदा प्रथमच भाविकांना श्रींची चंदनउटी पूजा ऑनलाईन पध्दतीने बुकींग करण्यास उपलब्ध करून दिली होती. त्यास भाविकांचा चांगला प्रतिसाद मिळाला. या पूजेच्या माध्यमातून मंदिर समितीला सुमारे 35 लक्ष 13 हजार रुपये उत्पन्न प्राप्त झाले आहे. चंदनउटीपुजेच्या सांगतानिमित्त श्री संत तुकाराम भवन येथील अन्नछत्रामध्ये विशेष भोजन व्यवस्था करण्यात आली होती. त्यामध्ये सुमारे 2000 ते 2500 भाविकांनी लाभ घेतला आहे.
