पंढरपूर : श्री विठ्ठल-रुक्मिणीमातेच्या नित्यपूजा, पाद्यपूजा, तुळशी अर्चन पूजा, महानैवेद्य सहभाग योजना या सर्व प्रकारच्या पूजा श्री विठ्ठल-रुक्मिणी मंदिर समितीकडून भाविकांना उपलब्ध करून देण्यात येतात. दि. 1 ऑगस्ट ते 31 डिसेंबर या कालावधीतील पूजांची ऑनलाईन पध्दतीने नोंदणी करण्याची सुरुवात दि. 28 जुलै रोजी सकाळी 11 पासून होत आहे. भाविकांनी याचा लाभ घ्यावा, असे आवाहन मंदिर समितीचे सहअध्यक्ष गहिनीनाथ महाराज औसेकर यांनी केले आहे.
श्री विठ्ठल-रुक्मिणी मंदिर समितीच्या दि. 15 जून रोजीच्या सहअध्यक्ष गहिनीनाथ महाराज औसेकर यांच्या अध्यक्षतेखाली झालेल्या सभेत निर्णय घेण्यात आला होता. यासाठी संगणक प्रणाली विकसित करण्यात आली आहे. भाविकांना पूजेची नोंदणी https://www.vitthalrukminimandir.org या मंदिर समितीच्या अधिकृत संकेतस्थळावरून करता येणार आहे.
यापूर्वी पहिल्या टप्प्यात दि. 7 ऑक्टोबर ते 31 डिसेंबर 2024, दुसर्या टप्प्यात दि.1 जानेवारी ते 31 मार्च 2025 तसेच तिसर्या टप्प्यात दि. 1 एप्रिल ते 31 जुलै या कालावधीतील श्री विठ्ठल- रुक्मिणीच्या नित्यपूजा, तुळशी अर्चन पूजा व पाद्यपूजा ऑनलाईन नोंदणीसाठी भाविकांना उपलब्ध करून देण्यात आल्या होत्या. यामध्ये महाराष्ट्र राज्याच्या विविध कानाकोपर्यातून व देशभरातून भाविकांनी पूजेची नोंदणी केली होती. यास भाविकांचा चांगला प्रतिसाद मिळत आहे.
आता, चौथ्या टप्प्यात दि. 1 ऑगस्ट ते 31 डिसेंबर या कालावधीतील सण, उत्सव व गर्दीचे दिवस वगळून इतर दिवशीच्या श्री विठ्ठल- रुक्मिणीच्या नित्यपूजा व पाद्यपूजा तसेच दि. 1 ते 31 ऑगस्ट कालावधीतील तुळशी अर्चन पूजा व महानैवेद्य सहभाग योजना ऑनलाईन नोंदणीसाठी भाविकांना उपलब्ध करून देण्यात येत आहेत. ऑनलाईन नोंदणीसाठी काही अडचणी आल्यास मंदिर समितीच्या नित्योपचार कार्यालयातून नोंदणी करून देण्यास मदत करण्यात येणार आहे. याबाबतची अधिक माहिती, अटी व शर्ती मंदिर समितीच्या अधिकृत संकेतस्थळावर उपलब्ध आहेत. तसेच अधिक माहितीसाठी मंदिर समितीच्या 02186 -299299 या दूरध्वनी क्रमांकावर भाविकांनी संपर्क साधावा. याशिवाय पूजेचे बुकिंग मंदिर समितीच्या अधिकृत संकेतस्थळावरूनच करावे. कोणत्याही त्रयस्थ व्यक्तीस संपर्क करू नये, असे आवाहन कार्यकारी अधिकारी राजेंद्र शेळके यांनी केले आहे.
श्री विठ्ठलाच्या नित्यपूजेसाठी रु. 25,000 व श्री रुक्मिणीमातेच्या नित्यपूजेसाठी रू.11,000 तसेच पाद्यपूजेसाठी रू.5,000 व तुळशी अर्चन पूजेसाठी रू. 2100 आणि महानैवेद्य सहभाग योजनेसाठी रू. 7,000 इतके देणगी मूल्य आकारण्यात आले आहे.
