अंजनगाव खेलोबा : अवकाळी वादळी पावसामुळे ग्रामीण भागातील वीज पुरवठा वारंवार खंडित होत आहे. जोरदार वार्यामुळे विजेच्या तारा तुटणे, खांब कोसळणे, ट्रान्सफॉर्मर बिघडणे यामुळे अनेक ठिकाणी तासंतास अंधार पसरतो, अशा बिकट परिस्थितीत वायरमन आपला जीव धोक्यात घालून वीजपुरवठा सुरळीत करण्यासाठी झटतात मात्र काम करत असताना सारखे वीज ग्राहकांचे फोन येत असल्याने ते वायरमनच्या जीवावर बेतण्याची शक्यता व्यक्त होत आहे.
अवकाळी पावसाने वीजपुरवठा खंडित झाल्याने ग्राहकांकडून लाईट कधी येणार आहे हे विचारण्यासाठी असंख्य फोन कॉल वायरमनला येत असतात. वादळात तारा तुटणे, शॉर्टसर्किट होणे, खांब वाकणे अशा घटनांमुळे विजपुरवठा खंडित होत आहे. पावसात आणि वादळात धोकादायक परिस्थिती असताना वायरमनला खांबावर चढून काम करावे लागते. कधी कधी ट्रान्सफॉर्मर मध्ये बिघाड असल्यास तिथेही काम करावे लागते. हे काम अतिशय काळजीपूर्वक करावे लागते.
हे काम करत असताना अनेक वीज ग्राहक वायरमनला फोन करून वीज कधी येणार आहे असे विचारत असतात त्यामुळे त्यांचे लक्ष विचलित होण्याची शक्यता असते अशा प्रसंगी ग्राहकांनी वायरमनला सहकार्य करून संयम बाळगणे अपेक्षित असते, त्यांच्या कामात सहकार्य करणे ही आपली जबाबदारी आहे हे सर्वांनी मान्य करणे गरजेचे आहे.
