Solapur News : कचरा टाकण्याच्या ठिकाणी आढळले पुरुष जातीचे अर्भक

पोखरापूर : मोहोळ तालुक्यातील चिखली गावात बुधवारी पुरुष जातीचे एक अर्भक अडगळीच्या ठिकाणी कचरा टाकण्याच्या ठिकाणी सापडल्यामुळे खळबळ उडाली. पोलिसांनी स्थानिक नागरिकांच्या मदतीने तत्काळ त्याला मोहोळ येथील खासगी रुग्णालयात उपचारासाठी पाठवले असून सध्या तरी अर्भकाची प्रकृती सुस्थितीत आहे.

मोहोळ तालुक्यातील चिखली गावात एका किराणा दुकानाच्या जवळील बोळात अडगळीच्या ठिकाणी एका कपड्यामध्ये गुंडाळलेल्या अवस्थेत एक पुरुष जातीचे अर्भक असल्याचे नागरिकांना बुधवारी दुपारी दीडच्या सुमारास दिसले. त्यांनी तत्काळ मोहोळ पोलिस ठाण्याशी संपर्क साधला. स्थानिक नागरिकांच्या मदतीने तत्काळ त्याला मोहोळ येथील हॉस्पिटलमध्ये उपचारासाठी आणण्यात आले.