सोलापूर : पुढारी वृत्तसेवा
मागील दोन दिवसांपासून हुबळीकडे जाणार्‍या अनेक गाड्या रद्द केल्या आहेत. यात आता सोलापूर-होसपेटसह अन्य गाड्याही रद्द झाल्याने सोलापूरहून पर्यटनासाठी जाणार्‍या पर्यटक व प्रवाशांना हंपी, होसपेटला जाण्याचा बेत रद्द करावा लागणार आहे. दक्षिण-पश्चिम रेल्वेच्या विजयपुरा-होटगी सेक्शनमधील लच्यान-तडवळ स्थानकादरम्यान भीमा पुलाजवळ मालगाडीचे इंजिन बुधवारी (दि. 25) मध्यरात्री दीड वाजता रुळावरून घसरले. त्या ट्रॅकच्या दुरुस्तीसाठी या गाड्या रविवारपर्यंत रद्द केल्या आहेत.
तडवळजवळ भीमा नदीच्या शेजारून जाणार्‍या रुळावरून मालवाहतूक गाडीचे इंजिन घसरल्याने सोलापूर रेल्वे विभागातील तसेच दक्षिण पश्चिम रेल्वे विभागातील अनेक गाड्या रद्द केल्या. हा ट्रॅक दुरुस्त करण्यासाठी रेल्वेचे अधिकारी, कर्मचारी प्रयत्न करीत आहेत. पण, दुरुस्तीसाठी आणखीन चार ते पाच दिवस लागतील असा अंदाज व्यक्त केला आहे. यामुळे प्रवाशांची मोठी गैरसोय होणार आहे.
