सोलापूर : यंदा सोलापूरकरांसाठी उन्हाळा तापदायक ठरत असून, 11 एप्रिल रोजी 41.4 अंश सेल्सिअस इतक्या उच्चांकी तापमानाची नोंद झाली. यंदाच्या मोसमातील हे सर्वाधिक तापमान ठरले. दरम्यान, हवामान तज्ज्ञांच्या मते पुढील येत्या 4-5 दिवसांत सोलापूरचा उन्हाचा पारा 42 से. ते 43 से. पर्यंत जाण्याची चिन्हे आहेत.
यंदाच्या उन्हाळ्यात पाच वेळा कमाल तापमानाचा पारा 40 अंश पार केला. हवेतील आर्द्रता 31 टक्के असल्याने कोरड्या हवेमुळे उन्हाचे चटके अधिक तीव्र स्वरूपात जाणवले. दुपारी 12 ते सायंकाळी 5 या काळात शहरात अक्षरशः ओव्हन सारखी स्थिती जाणवली. तज्ज्ञांच्या मते पुढील 48 ते 72 तासांत विदर्भ आणि लगतच्या मराठवाड्यात उष्णतेची लाट येण्याची शक्यता आहे, ज्याचा थेट परिणाम सोलापूरच्या तापमानावर होण्याचा अंदाज आहे.
