सोलापूर : सोलापूरने हिंदू-मुस्लिम ऐक्याचे दर्शन वारंवार दिले आहे. अठरापगड जाती-जमातींच्या सहभागातून मोहरम उत्सव साजरा करताना सामाजिक आणि सांस्कृतिक एकोपा दिसून येतो. रविवारी दुपारी मोहरम उत्सवाची सवारी निघाली. यंदा मोहरम आणि आषाढी एकादशी एकाच दिवशी आल्याने पीर बडा मंगलबेडा (अहले हरम) सवारीला चौपाड विठ्ठल मंदिरातून विठ्ठलाचा प्रिय असलेला तुळशीहार अर्पण करण्यात आला. त्यानंतर सवारीकडून विठ्ठलाला तुळशीहार अर्पण करत हिंदू-मुस्लिम एकोप्याचे दर्शन घडविले.
थोरला मंगळवेढा तालीम येथील प्रसिध्द बडा मंगलबेडा (अहले हरम) सवारीची अडीचशे वर्षांची परंपरा आहे. मूळ मंगळवेढ्यातून सोलापुरात कसबा पेठेत राजपूत समाजातील दीक्षित कुटुंबीयांच्या ताब्यात आलेल्या या सवारीची पूजाअर्चा मुजावर कुटुंबामार्फत वंश परंपरेने केली जाते. या सवारीच्या प्रथम दर्शनाचा मान विमुक्त भटक्या वडार व अन्य उपेक्षित समाजाला दिला जातो. राजपूत, मराठा, धनगर, मुस्लीम, गवळी, लोणारी, गवंडी, सुतार, पिंजारी, मोची, बुरूड, माळी, सोनार, तेली, कोष्टी, कासार आदी समाजाच्या भाविकांची मोठी श्रध्दा आहे.
रविवार दि. 6 जैल रोजी सकाळी मोहरमच्या शहादत दिनी बडा मंगलबेडा सवारीची मिरवणूक हलगी, ताशा, संगीत बन्डसह वाजत-गाजत निघाली. हा मिरवणूक सोहळा चौपाड मंदिराजवळ पोहोचला. तेव्हा आषाढी एकादशीनिमित्त आलेल्या भाविकांनी सवारीचेही दर्शन घेतले. विठ्ठलाला प्रिय मानला जाणारा तुळशीहारही मंदिरातून आणून सवारीला अर्पण केला गेला. मंदिराचे प्रमुख विश्वस्त रमेश खरात आणि मुख्य पुजारी नितीन कुलकर्णी यांनी ही सेवा रुजू केली. त्यानंतर सवारीच्यावतीनेही मंदिरात विठ्ठल-रुक्मिणी मूर्तींना तुळशीहार आणि श्रीफळ अर्पण करण्यात आला.
कोणताही गाजावाजा न करता ही कृती तेवढ्याच सहजपणे झाल्याचे दिसून आले. वाटेत महिला भाविकांनी जलकुंभाद्वारे सवारीचे पदप्रक्षालन केले. शहरात सुमारे 250 पंजांची प्रतिष्ठापना करण्यात आली होती. गेले सहा दिवस विशिष्ट पंजांच्या मिरवणुका निघाल्या. बडे मौला अली, अकबर अली, घोडेपीर, दुर्वेश पंजे, तलवार पंजे, मुस्लीम पंजे आदी पंजांच्या मिरवणुका रीतीरिवाजाप्रमाणे काढण्यात आल्या.
