अकलूज : माढा लोकसभा मतदारसंघाचे खासदार धैर्यशील मोहिते-पाटील यांनी केंद्रीय संचार मंत्री ज्योतिरादित्य सिंधिया यांची नवी दिल्ली येथे भेट घेऊन अकलूज येथे पासपोर्ट सेवा केंद्र (पोस्ट ऑफिस पासपोर्ट सेवा केंद्र) स्थापन करण्याची मागणी केली.
खासदार मोहिते-पाटील यांनी सांगितले की, अकलूज हे सोलापूर जिल्ह्यातील एक महत्त्वाचे व्यापारी आणि शैक्षणिक केंद्र आहे. सध्या अकलूजमध्ये पासपोर्ट सेवा उपलब्ध नसल्याने माळशिरस तालुक्यातील सीमावर्ती भागातून स्थानिक नागरिकांना माढा येथे असलेल्या केंद्रांवर जावे लागते. या केंद्रांवर अतिरिक्त ताण असल्याने अपॉईंटमेंटसाठी 15 दिवसांहून अधिक प्रतीक्षा करावी लागत आहे. यामुळेे नागरिकांना मोठ्या अडचणींचा सामना करावा लागतो. ज्यामुळे त्यांचा वेळ आणि पैसा दोन्ही खर्च होतो.
अकलूज येथे पासपोर्ट सेवा केंद्र उपलब्ध झाल्यास नागरिकांना मोठा दिलासा मिळणार आहे. विशेषत: विद्यार्थी, व्यावसायिक आणि परदेशात नोकरीसाठी जाणार्या तरुणांना याचा फायदा होईल. यावेळेस केंद्रीय मंत्री ज्योतिरादित्य शिंदे यांनी या मागणीचा सकारात्मक विचार करून आवश्यक कार्यवाही करण्याचे आश्वासन दिले असल्याचेही खा. मोहिते-पाटील यांनी सांगितले.
