पंढरपूर : आषाढीसाठी अनेक दिंड्या पंढरपूरकडे येत आहेत. अशातच महाराष्ट्रातील 80 शहरातून 4 हजार सायकल्सची दिंडी पंढरपुरात येऊन पोहोचली आहे. पंढरपुरात सायकल संमेलन होत आहे. या निमित्ताने सायकल स्वारांनी वारकरी परंपरेप्रमाणे सायकलवरून नगरप्रदक्षिणा केली. केंद्रीय मंत्री रक्षा खडसे, ग्रामविकास व पंचायत राज मंत्री तथा जिल्ह्याचे पालकमंत्री जयकुमार गोरे, खासदार धैर्यशील मोहिते-पाटील, आमदार रणजितसिंह मोहिते पाटील यांनी सायकल दिंडीचे उदघाटन करून दिंडीत सहभाग घेतला.
फिट इंडिया या राष्ट्रीय कार्यक्रम अंतर्गत या दिंडीमध्ये सायकल सारख्या व्यायामाचे महत्त्व पटवून देण्यात आले. राज्यातील कानाकोपर्यातून आलेल्या सायकल स्वारांमुळे पंढरी नगरी वेगळ्याच आध्यात्मिक वातावरणात सामावून गेलेली पहायला मिळाली. यावेळी उपयोगी पोलिस अधिकारी अर्जुन भोसले, मुख्याधिकारी महेश रोकडे उपस्थित होते.
