पोखरापूर : मोहोळ तालुक्यातील येवती गावात ३९ किलो २०० ग्रॅम वजनाची पांढरी पावडर, जी अमली पदार्थ कोकेन असल्याचा संशय आहे, जप्त करण्यात आली. या प्रकरणी सिद्धेश्वर हनुमंत राजगुरू (रा. येवती) आणि रामहरी शिवाजी वाघमारे (रा. वाफळे, ता. मोहोळ) या दोघांविरुद्ध मादक द्रव्य आणि मनोव्यापारावर परिणाम करणारे पदार्थ अधिनियमांन्वये गुन्हा दाखल करून अटक करण्यात आली आहे. ही घटना मंगळवारी (दि. १८ सप्टेंबर) उघडकीस आली.
गुप्त माहितीवर छापा
मोहोळ पोलिसांना गोपनीय सूत्रांकडून माहिती मिळाली होती की येवती गावात मोठ्या प्रमाणात ड्रग्जचा साठा करण्यात आला आहे. त्यानुसार पोलीस निरीक्षक हेमंत शेडगे यांच्या मार्गदर्शनाखाली पथकाने गुरुवारी सायंकाळी साडेपाच वाजता छापा टाकला. त्यावेळी राजगुरू यांच्या घरात दोन्ही आरोपी पांढऱ्या रंगाच्या पोत्यामध्ये संशयित पावडर बाळगताना आढळून आले. या प्रकरणी मोहोळ पोलिसांनी रात्री उशिरा गुन्हा नोंदवून आरोपींना अटक केली. पुढील तपास सहाय्यक पोलीस निरीक्षक किरण पाटील करत आहेत.
फॉरेन्सिक तपासणीनंतर उलगडा
जप्त पावडरचे नमुने पुणे येथील फॉरेन्सिक लॅबमध्ये पाठवण्यात आले आहेत. अंतिम अहवाल आल्यानंतरच ती पावडर खरोखरच कोकेन की इतर कोणत्या अमली पदार्थाशी संबंधित आहे याचा खुलासा होईल, असे पोलीस निरीक्षक हेमंत शेडगे यांनी सांगितले.
