संजय कुलकर्णी
तुळजापूर ः महाराष्ट्राची कुलस्वामिनी श्री तुळजाभवानी मातेच्या शारदीय नवरात्र महोत्सवातील सहाव्या माळेला शनिवारी दुपारी चार वाजेपर्यंत दोन लाखाहून अधिक भाविकांनी मातेच्या दर्शनाचा लाभ घेतला. सकाळी सहा ते 10 वाजेपर्यंत पंचामृत अभिषेक, नित्योपचार पूजा पार पडल्यानंतर मातेची मुरली अलंकार महापूजा बांधण्यात आली. दरम्यान, मध्यरात्रीपासून पावसाची रिपरिप सुरूच आहे. भाविकांनी पावसाचा अंदाज घेऊन रेनकोट, छत्र्या सोबतच ठेवल्या.
आज दिवसभर सूर्यदर्शन झाले नाही. पाचव्या माळेपासून तुळजापूर शहरातील सर्व रस्ते भाविकांच्या खचाखच गर्दीने फुलून गेले असतात. मात्र, आज याउलट परिस्थिती होती. डोक्यावर पावसाचा मारा आणि मुखी आई राजा उदो, उदोचा जयघोष करीत भाविकांनी दर्शन घेतले.
श्री तुळजाभवानी मातेने शारदीय नवरात्रातील नऊ दिवसात दैत्याशी घनघोर युद्ध करून त्याचा वध केल्यानंतर सर्व देवीदेवता दैत्याच्या त्रासातून मुक्त झाले. त्याप्रसंगी आनंदित होऊन भगवान श्रीकृष्णांनी स्वतःकडील मुरली मातेस अर्पण केली. याप्रसंगाची आठवण म्हणून श्री तुळजाभवानी मातेची मुरली अलंकार विशेष अवतार महापूजा बांधली जाते. मातेने मुरली वाजविल्यानंतर सर्व भयभीत देव स्वर्गप्राप्तीचा अनुभव घेऊ लागले. अशी आख्यायिका आहे.
