सोलापूर: शहरातील विविध रस्ते दैनंदिन झाडणे, तुंबलेली भूमिगत गटारी पूर्ववत करणे आणि विविध ठिकाणी असलेली सार्वजनिक स्वच्छतागृहांची साफसफाई करणे आदींसह शहर स्वच्छ करण्यासाठी सोलापूर महानगरपालिकेचे एक हजार 627 कामगारांचे हात राबत आहेत.
महापालिकेच्या घनकचरा व्यवस्थापन विभागाच्यावतीने शहरातील विविध रस्ते महिला आणि पुरुष झाडूवाल्यांकडून दैनंदिन झाडण करून घेतली जाते. यासाठी 592 महिलांसह पुरुष रस्ते झाडतात. यांचे कामकाज पहाटेच सुरू होते. विभागीय कार्यालयनिहाय या कर्मचार्यांची नेमणूक केली जाते. प्रत्येक झाडूवाल्या कर्मचारी यांना रस्त्याच्या दर्जावरून विशिष्ट अंतर रस्ते झाडण्यासाठी ठरवून दिली जाते. शिवाय, ते झाडतात की नाही हे पाहण्यासाठी सुपरवायझर असतात. तसेच शहरातील विविध झोपडपट्टीसह अनेक ठिकाणी सार्वजनिक स्वच्छतागृहे आहेत. या सार्वजनिक स्वच्छतागृहांची दैनंदिन स्वच्छता करावी लागते. यासाठी 437 सफाई कामगार अविरतपणे काम करतात. पावसाळ्यात आणि अन्य वेळी तुंबलेल्या गटारीतील गाळ काढणे आणि गाळाने भरलेले चेंबर स्वच्छ करणे आदी कामे नेहमीच चालू असतात. यासाठी 464 बिगारींची नेमणूक केलेली आहेत. तसेच झाडूवाले, सफाई कामगार बिगारी यांच्या गैरहजेरीत काम करइण्यासाठी 78 बदली कामगार आहेत. तसेच कायम नसलेले आणि नियमित काम करत असलेले 56 रोजंदारी बिगारी म्हणून काम करीत आहेत.
अशा प्रकारे शहर स्वच्छ करण्यासाठी मानपाच्या घनकचरा व्यवस्थापनातील अनेक कर्मचारी काम करीत आहेत. निसंकोचपणे शहर स्वच्छ करण्याची मोठी जबाबदरी यांच्यावर आहे. राष्ट्रपती, पंतप्रधान, मुख्यमंत्री किंवा राज्यपाल असे अतिमहत्त्वाच्या व्यक्तींचे दौरे असल्यास ते ज्या रस्त्यावरून ये-जा करणार असतात त्याच्या स्वच्छतेसाठी यांची दमछाक होते. अशा वेळी विविध भागातील कर्मचारी यांची एकाच परिसरात नेमणूक करावी लागते.
