वेणेगाव /अंगापूर : अपशिंगे मिलिटरी (ता. सातारा) येथील लोकनियुक्त सरपंचांच्या विरोधात प्रथमच गावकर्यांचे गुप्त मतदान घेण्यात आले. याबाबतचा अविश्वास ठराव मंजूर करण्यात आला. अविश्वास ठरावाच्या बाजूने 1063 तर ठरावाच्या विरोधात 807 मते पडली. त्यामुळे 256 मतांनी अविश्वास ठराव मंजूर झाला. दरम्यान, लोकनियुक्त सरपंचांना अशा पद्धतीने पायउतार व्हावे लागल्याची जिल्ह्यातील ही पहिलीच घटना ठरली.
अपशिंगे मिलिटरी (ता. सातारा) येथील सरपंच तुषार शिवाजी निकम यांच्याविरूद्धचा हा ठराव मंजूर झाला. लोकनियुक्त सरपंच म्हणून निवडून आल्यानंतर सुमारे अडीच वर्षांच्या कालावधीनंतर अविश्वास ठराव आणता येतो. त्यानुसार सरपंच निकम यांच्यावर अविश्वास ठराव सादर करण्यात आला होता. त्यानुसार शुक्रवारी गावातील मतदारांचे मतदान घेण्यात आले. सकाळी 11 ते 4 या वेळेत मतदान प्रक्रिया पार पडली. एकूण 3391 मतदानापैकी 1931 मतदारांनी नोंदणी केली होती. त्यापैकी 1907 मतदारांनी मतदानाचा हक्क बजावला. 37 मते अवैध ठरली. अविश्वास ठरावाच्या बाजूने 1063 तर ठरावाच्या विरोधात 807 मते पडली.
या मतदान प्रक्रियेचे अध्यासी अधिकारी म्हणून सातारा पंचायत समितीचे गटविकास अधिकारी निलेश पाटील यांनी काम पाहिले. लोकनियुक्त सरपंचाविरुद्ध गुप्त मतदानाने अविश्वास ठराव मंजूर होण्याची ही दुर्मीळ घटना अपशिंगे मिलिटरीसह संपूर्ण तालुक्यात चर्चेचा विषय ठरली. स्थानिक ग्रामस्थांमध्ये या निवडणुकीबाबत उत्सुकता आणि तणाव दोन्ही निर्माण झाले होते. या घटनेने आगामी ग्रामपंचायत निवडणुकीसह राजकीय समीकरणांवरही परिणाम होण्याची चिन्हे आहेत. निवडणूक प्रक्रिया शांततेत पार पाडण्यासाठी बोरगाव पोलीस ठाण्याचे सहाय्यक पोलीस निरीक्षक धोंडीराम वाळवेकर यांच्या मार्गदर्शनाखाली चोख बंदोबस्त ठेवण्यात आला होता. निवडणूक प्रक्रिया सहा बुथवर सुरळीत पार पडली. त्यासाठी ग्रामपंचायत अधिकारी व महसुल विभागाचे कर्मचारी यांनी विशेष परिश्रम घेतले.
