कराड : जमिनीच्या वहिवाटीच्या कारणावरून वारुंजीत झालेल्या मारामारीत दोन पोलिस कर्मचार्यांनाही मारहाण करण्यात आल्याची घटना शनिवारी दुपारी वारुंजी (ता. कराड) येथे घडली.
याप्रकरणी शासकीय गणवेशातील पोलिस कर्तव्य बजावीत असताना सरकारी कामामध्ये हस्तक्षेप करून शिवीगाळ, धक्काबुक्की करुन मारहाण केल्याचा पाच जणांवर गुन्हा दाखल करण्यात आला आहे. अंकुश श्रीपती पाटील, प्रमोद अंकुश पाटील, धनाजी श्रीपती पाटील, शिला अंकुश पाटील, मंदाकिनी धनाजी पाटील (सर्व रा. वारुंजी, ता. कराड) असे गुन्हा दाखल करण्यात आलेल्यांची नावे असल्याची माहिती शहर पोलिसांनी दिली.
पोलिसांची माहिती अशी : वारुंजी येथील जयवंत शंकर गुरव यांच्या मिळकतीत वहीवाटीबाबत हरकत अडथळा होत असल्याने पोलीस संरक्षण मिळण्यासाठी मागणी केली होती. त्यानुसार पोलिस कर्मचारी किशोर पंडित तारळकर, सोनाली पिसाळ, गायकवाड हे बंदोबस्तासाठी वारुंजीत गेले होते. त्यावेळी अर्जदार यशवंत गुरव, शशिकांत विलास गुरव, मोहन शंकर गुरव असे हजर होते. त्यावेळी प्रमोद अंकुश पाटील हा तेथे आला व त्याने शशिकांत गुरव यांना संबंधित मिळकतीचा दावा न्यायालयात सुरु असून तुम्ही येथे येऊ नका असे सांगीतले.
त्यावेळी शशिकांत गुरव यांनी त्यांना दिवाणी न्यायालयाने दिलेली आदेशाची प्रत दाखवली. त्यावरुन त्यांचा वाद झाला. त्यावेळी पोलिस कर्मचार्यांनी आपसात भांडु नका असे सांगीतले. त्यादरम्यान अंकुश पाटील याने पत्र्याचे शेडमधुन शशिकांत गुरव यांना अचानक दगड मारला. त्यावेळी शशिकांत गुरव व अंकुश पाटील यांच्यात मारामारी झाली. त्यादरम्यान प्रमोद पाटीलनेही शशिकांत गुरव यांच्याबरोबर वाद घातला. त्यावेळी पोलिस कर्मचारी गायकवाड, सोनाली पिसाळ हे त्यांचा वाद सोडवण्यास गेल्यावर अंकुश पाटील याने गायकवाड यांना शर्टाची कॉलर पकडुन धकाबुकी केली. त्याच वेळी धनाजी श्रीपती पाटील हे शेडमध्ये गेले. त्यावेळी शिला अंकुश पाटील व मंदाकिनी धनाजी पाटील या तेथे आल्या. पोलीसांना शिवीगाळ करु लागल्या.
त्यामुळे पोलिस कर्मचारी तारळकर भांडणे सोडविण्यासाठी गेले असता अंकुश पाटील याने त्यांनाही दगड मारुन जखमी केले. त्यावेळेस शिला अंकुश पाटील व मंदाकिनी धनाजी पाटील यांनी महिला पोलिस कर्मचारी सोनाली पिसाळ यांना धक्काबुक्की केली. त्यावरुन संबंधित पाच जणांविरोधात शासकीय गणवेशातील पोलीस कर्तव्य बजावीत असताना सरकारी कामामध्ये हस्तक्षेप करू शिवीगाळ, धक्काबुक्की करुन मारहाण केल्याची गुन्हा दाखल करण्यात आला आहे.
