सातारा : गुरुवार परज परिसरातील लजीज बिर्याणी या हॉटेलमध्ये जेवणाचे पैसे का घेतोस, अशी दमबाजी करत एका टोळक्याने हॉटेल मालक आणि त्याचा पुतण्या यांना बेदम मारहाण केली. यावेळी जोरदार दगडफेकही झाली. त्यामध्ये दोघेजण जखमी झाले आहेत. ही घटना शुक्रवारी रात्री सव्वानऊच्या दरम्यान घडली. या घटनेने परिसरातील वातावरण तंग झाले होते. शहर पोलीस ठाण्यासमोर पहाटे 3 वाजेपर्यंत जमावाने गर्दी केली होती.
याप्रकरणी मुक्तार शेरअली पालकर यांनी शहर पोलीस ठाण्यात फिर्याद दिली आहे.अमोल चंदू खवळे, अजय नथू गायकवाड (दोघे रा. नामदेववाडी झोपडपट्टी), सुरज कांता दांडे (रा. मोळाचा ओढा), ओमकार राजेंद्र पवार (रा. शुक्रवार पेठ) आणि अन्य पाच ते सहा जणांच्या विरोधात गुन्हा नोंद करण्यात आला आहे. याप्रकरणी खवळे व गायकवाड याला ताब्यात घेण्यात आले आहे. नामदेववाडी झोपडपट्टी येथील अमोल खवळे व ओंकार पवार हे शुक्रवारी रात्री नऊच्या सुमारास लजीज बिर्याणी येथे चिकन 65 घेण्यासाठी आले.
ओंकार पवार हा तेथील कर्मचार्याशी वाद घालू लागला. त्यावरून बाचाबाची वाढत जाऊन अमोल खवळे, ओंकार पवार यांनी मालक मुक्तार पालकर यांना ‘तुझे हॉटेल चालू देणार नाही, तुला सोडणार नाही’, असा दम देत त्यांना व पुतण्या अबरार याला धक्काबुक्की केली. त्यांच्यातील काही लोकांनी हॉटेलमध्ये येऊन तेथील फर्निचरची तोडफोड केली आणि फिर्यादीच्या खिशातील दोन हजार रुपये चोरले. पालकर व अबरार यांना लाथाबुक्क्यांनी व दगडांनी मारहाण करण्यात आली. या मारहाणीत रस्त्याने जाणारा साबीर आदम शेख (रा. गुरुवार पेठ) हा सुद्धा जखमी झाला आहे.
हॉटेलमध्ये झालेल्या भांडणाचे पडसाद उमटताच तेथे तणावाचे वातावरण निर्माण झाले. याबाबत माहिती समजताच सातारा पोलिसांनी तात्काळ घटनास्थळी धाव घेतली. बघता बघता बघ्यांची गर्दी झाली. तेथील वातावरण शांत होताच परिसरातील नागरिकांनी सातारा शहर पोलीस ठाण्यावर गर्दी केली होती. यावेळी अनेक अफवा पसरल्याने पोलीस स्टेशन बाहेर मोठ्या प्रमाणात जमाव दाखल झाला. मात्र, पोलिसांनी संबंधितांवर कारवाई करण्याचे आश्वासन दिले त्यानंतर हा तणाव निवळला. सुमारे सहा-तास पोलीस ठाण्यासमोर तणाव होता.
