सातारा : जय श्रीराम... जय श्रीराम... च्या घोषणा देत सतारा जिल्ह्यात रविवारी मोठ्या उत्साहात व विविध धार्मिक कार्यक्रमांनी श्रीराम नवमी साजरी करण्यात आली. जिल्ह्यातील विविध मंदिरांत भाविकांनी दर्शनासाठी गर्दी केली होती.
सातारा येथे श्रीकृष्ण यजुर्वेद पाठशाळेत सुरु असलेल्या नऊ दिवसीय श्री राम महा यज्ञाची सांगता आज दुपारी रामनवमीला पूर्णाहूतीने वेदमूर्ती विवेक शास्त्री गोडबोले यांच्या हस्ते करण्यात आल्यानंतर जन्म काळाचे कीर्तन सादर करण्यात आले. सायंकाळी यज्ञस्थळापासून सातारा शहरात भव्य शोभायात्रा काढून रामभक्तांनी आनंद लुटला.
दरम्यान, शहरातील मंगळवार पेठ येथील श्री काळाराम मंदिर, प्रतापगंज पेठेतील श्रीगोरा राम मंदिर, शनिवार पेठ येथील श्री शहाराम मंदिर, समर्थ मंदिर परिसरातील श्री दामले राम मंदिर तसेच शाहूपुरी गेंडामाळ येथील पाटील परिवाराच्या श्री शांत राम अर्थात राम ध्यान मंदिरातही राम जन्मानिमित्त विशेष फुलांची सजावट तसेच विविध कार्यक्रमांचे आयोजन करण्यात आले होते.
दुपारी बारा वाजता मंदिरांमध्ये गुलाल व पुष्पवृष्टी करुन श्रीरामाचा जन्मोत्सव महिलांनी पाळण्यामध्ये श्रीफळ रुपी श्रीरामाला जोजवून पाळणा गीते म्हणून साजरा केला. यावेळी श्री राम जय राम जय जय राम चा जय जयकार रामभक्तांनी केला.
त्यानंतर महाआरती झाल्यावर सुंठवडा व प्रसाद वितरण करण्यात आला. शहरातील प्रतापगंजपेठेतील श्री गोराराम मंदिरात रामभक्तांनी पंचधातूच्या राममूर्तींची मंदिर परिसरात पालखीतून मिरवणूक काढली. श्री क्षेत्र सज्जनगड येथे रामनवमी निमित्त विशेष पूजा तसेच पवमान पंचसूक्तचा अभिषेक श्रीराम मूर्तीला घालण्यात आला.
समर्थ रामदास स्वामींचा जन्म श्री राम नवमीला झाल्याने सज्जनगड येथील मंदिरात जन्मोत्सव मोठ्या उत्साहात साजरा करण्यात आला . मर्ढे ता. सातारा येथील श्रीराम मंदिरातही रामनवमी निमित्त विविध धार्मिक कार्यक्रम संपन्न झाले. दर्शनासाठी भाविकांनी गर्दी केली होती.
श्रीक्षेत्र गोंदवले येथील ब्रह्मचैतन्य महाराज गोंदवलेकर संस्थांमध्येही रामनवमीचा विशेष उत्साह दिसून येत होता. गोंदावले येथील श्री थोरले राम मंदिर व धाकटे राम मंदिरात विशेष सजावट करण्यात आली होती. ही लक्षवेधी आकर्षक सजावट पाहण्यासाठी रात्री उशिरापर्यंत रामभक्तांनी गर्दी केली होती. सातारा जिल्ह्यातील फलटण येथील नाईक निंबाळकर यांच्या राजघराण्याच्या श्रीराम मंदिरातही भव्य श्रीराम जन्मोत्सव साजरा करुन गुलालाची उधळण करण्यात आली.
