Dr. Shrikant Shinde Satara visit friend wedding
सातारा: राजकारणाच्या व्यापात अनेकजण जुने मित्र आणि नाती विसरतात, असा सर्वसाधारण समज आहे. मात्र, खासदार डॉ. श्रीकांत शिंदे यांनी आपल्या कॉलेज मित्राशी असलेली मैत्री आजही तितक्याच आपुलकीने जपल्याचे पाहायला मिळाले. परदेश दौऱ्यामुळे मित्राच्या लग्नाला उपस्थित राहता आले नाही, म्हणून त्यांनी साताऱ्यात पूजे दिवशी थेट मित्राच्या घरी जाऊन नवदाम्पत्याला शुभेच्छा दिल्या. त्यांच्या या कृतीमुळे सध्या साताऱ्यात या मैत्रीची जोरदार चर्चा सुरू आहे.
साताऱ्यातील सामाजिक कार्यकर्ते डॉ. अजित शिंदे आणि खासदार डॉ. श्रीकांत शिंदे हे कॉलेज जीवनापासूनचे अत्यंत जवळचे मित्र आहेत. डॉ. अजित शिंदे यांचा विवाह सोहळा नुकताच संपन्न झाला. मात्र, त्यावेळी डॉ. श्रीकांत शिंदे हे कामानिमित्त परदेश दौऱ्यावर असल्याने या विवाह सोहळ्याला उपस्थित राहू शकले नाहीत.
परदेशातून भारतात परतल्यानंतर डॉ. श्रीकांत शिंदे यांनी अजित शिंदे यांच्या साताऱ्यातील निवासस्थानी जाऊन त्यांची भेट घेऊन त्यांना शुभेच्छा दिल्या. एवढेच नव्हे तर, त्यांनी मित्राच्या घरी त्याच्या कुटुंबियांसोबत भोजनाचाही आस्वाद घेतला.
राजकारणात कितीही मोठे पद मिळाले, तरी पाय जमिनीवर असावेत आणि जुने मित्र विसरता कामा नयेत, हेच खासदार शिंदेंनी आपल्या कृतीतून दाखवून दिले आहे, अशा भावना सातारकरांकडून व्यक्त होत आहेत.
