सातारा : महाराष्ट्र शासनाच्या 150 दिवसाच्या सेवाकर्मी कार्यक्रमांतर्गत सातारा जिल्हा परिषदेचा राज्यात डंका वाजला आहे. त्यामुळे शनिवारी मुख्य कार्यकारी अधिकारी याशनी नागराजन यांचा राज्याचे मुख्यमंत्री देवेंद्र फडणवीस यांच्या हस्ते सन्मानपत्र देवून गौरव करण्यात आला.
शनिवारी मलबार हिल मुंबई येथील सह्याद्री अतिथीगृहात झालेल्या कार्यक्रमास राज्याचे सांस्कृतिक मंत्री अशिष शेलार यांच्यासह अन्य अधिकारी उपस्थित होते. महाराष्ट्र शासनामार्फत 150 दिवसाचा सेवाकर्मी कार्यक्रम राबवण्यात आला. या कार्यक्रमांतर्गत गुणांकन करताना आकृतीबंध, सेवाप्रवेश नियम, ज्येष्ठता सूची, पदोन्नती, सरळसेवा भरती, बिंदू नामावली, अनुकंपा भरती, आय गोट प्रशिक्षण, सेवापुस्तक या घटकांच्या अनुषंगाने संबंधित प्रशासकीय विभागाकडून सातारा जिल्हा परिषदेचे गुणांकन करण्यात आले. त्यामध्ये 80 पैकी 80 गुण जिल्हा परिषदेस मिळाले. त्यामुळे राज्यात आदर्शवत, असे काम सातारा जिल्हा परिषदेचे झाले.
या विशेष मोहिमेंतर्गत राज्यातील 34 जिल्हा परिषद कार्यालयामधून सातारा जिल्हा परिषदेने प्रथम स्थान मिळवले आहे. त्यामुळे मुख्य कार्यकारी अधिकारी याशनी नागराजन यांचा सन्मान मुख्यमंत्री देवेंद्र फडणवीस यांच्या हस्ते करण्यात आला. गौरवाबद्दल प्रशासनाचे अध्यक्ष डॉ. प्रिया शिंदे, उपाध्यक्ष राजू भोसले व जि. प. सदस्यांनी अभिनंदन केले.
