सातारा : मागील काही दिवसांपासून जिल्ह्यात तापमानाचा पारा पुन्हा चढू लागला आहे. उन्हाच्या झळा वाढल्याने अवघे जनजीवन होरपळू लागले आहे. उकाडा व घामाच्या धारा वाहू लागल्याने नागरिक हैराण झाले आहेत. सोमवारी थंड हवेचे ठिकाण असणारे महाबळेश्वरही तापले आहे.
महाबळेश्वरचे तापमान 35 वर, तर साताऱ्याचे तापमान 40.3 अंश सेल्सिअस नोंदवले गेले. सलग तिसऱ्या दिवशी तापमान चाळीशीपार गेल्याने सातारकरांच्या अंगाची लाहीलाही होत आहे. वाढते ऊन व उष्म्यामुळे आरोग्याच्या तक्रारी वाढल्या आहेत. उष्णतेच्या लाटेसदृश्य परिस्थिती निर्माण झाल्याने नागरिकांनी आरोग्याबाबत दक्षता घेण्याची गरज वाढली आहे.
उन्हाचा चटका वाढल्याने सकाळी 8 वाजता घामाच्या धारा वाहत आहेत. उन्हामुळे घराबाहेर पडणे मुश्कील होत असल्याने भर दुपारी रस्ते ओस पडत आहेत.
