सातारा : साताऱ्यातील बॉम्बे रेस्टॉरंट परिसरात बुधवारी रात्री ट्रकची ट्रॅक्टरला पाठीमागून जोराची धडक बसल्याने झालेल्या अपघातात ट्रॅक्टरचा अक्षरश: खुळखुळा झाला. या भीषण अपघातात ट्रॅक्टर चालकाचा मृत्यू झाला असून ट्रक दुभाजक तोडून दुसऱ्या लेनमध्ये पलटी झाला. या प्रकरणी सातारा शहर पोलिस ठाण्यात गुन्हा दाखल झाला आहे.
मनोज सुरेश मोरे (वय 38, रा. अमृतवाडी, ता.वाई) असे मृत्यू ट्रॅक्टर चालकाचे नाव आहे. यामध्ये ट्रक चालक सिमॉन (रा.तामिळनाडू) हा जखमी झाला असून त्याच्यावर खासगी रुग्णालयात उपचार सुरु आहेत. याबाबत पोलिसांनी दिलेली माहिती अशी, ही घटना बुधवारी रात्री 10.30 वाजण्याच्या सुमारास घडली आहे. ट्रॅक्टर शेंद्रे येथून वाईकडे निघाला होता. ट्रॅक्टर साताऱ्यातील बॉम्बे रेस्टॉरंट परिसरात असताना पुण्याकडे जाणाऱ्या ट्रक चालकाला अंदाज न आल्याने तो थेट ट्रॅक्टरवर जावून आदळला. ट्रकने ट्रॅक्टरला फरफटत नेत ट्रक दुभाजकावरुन दुसऱ्या लेनवर जावून पलटी झाला.
दहा सेकंदाच्या या अपघातामध्ये ट्रॅक्टरचा अक्षरश: खुळखुळा झाला. ट्रॅक्टरचे अनेक तुकडे होत मुख्य रस्त्यावर विखुरले. लोखंड, पत्रा, काचा, तेल याचा महामार्गावर खच पडला. ट्रॅक्टर चालक व ट्रक चालक दोघे गंभीर जखमी झाले. मदतीसाठी दोघांनी टाहो फोडला. अपघाताचा आवाज ऐकून परिसरातील नागरिकांनी धाव घेतली. यामुळे वाहतूक काही काळ ठप्प झाली. जखमींना बाहेर काढून रुग्णालयात दाखल केले. अपघाताची माहिती शहर पोलिसांना मिळाल्यानंतर त्यांनी घटनास्थळी धाव घेतली. अपघाताची परिस्थिती पाहून पोलिसही हादरुन गेले. जखमींची माहिती घेवून पोलिसांनी महामार्गावरील अपघातग्रस्त वाहने बाजूला केली. तोपर्यंत वाहतूक वळवण्यात आली. सुमारे 1 तासानंतर वाहतूक पूर्ववत झाली.
