सातारा : पंढरपूर येथील आषाढी एकादशी सोहळ्यानिमित्त महाराष्ट्र राज्य मार्ग परिवहन महामंडळाच्या सातारा विभागातील 11 आगारातील 256 बसेसच्या माध्यमातून 1 लाख 13 हजार 879 वारकर्यांना विठ्ठलाचे दर्शन घडवले. 1 कोटी 32 लाख 42 हजार 270 रुपयांचा विक्रमी महसूल मिळाला आहे.
पंढरपूर येथील आषाढी एकादशी सोहळ्यानिमित्त एसटी महामंडळाच्या सातारा विभागाने जादा बसेसचे नियोजन केले होते. दि. 2 ते 13 जुलैअखेर सातारा, कराड, पाटण, वाई, महाबळेश्वर, पारगाव-खंडाळा, फलटण, कोरेगाव, मेढा, दहिवडी, वडूज या 11 आगारातून भाविक व वारकर्यांच्या सोयीसाठी सोडण्यात आल्या. तसेच पंढरपूरहून थेट गावी जाण्यासाठी 40 अथवा त्यापेक्षा जास्त वारकर्यांनी एकत्रित मागणी केली होती.
त्यानुसार 10 ठिकाणी बसेस सोडण्यात आल्या. सातारा विभागातील 11 आगारातील 256 बसेसचे 2 लाख 28 हजार 784 किलोमीटर झाले. तर 1 हजार 377 फेर्यांमधून 1 लाख 13 हजार 879 भाविक वारकर्यांची सेवा करण्यात आली. या वाहतुकीमधून सातारा विभागास 1 कोटी 32 लाख 42 हजार 270 रुपयांचा महसूल मिळाला. या उल्लेखनीय सेवेमुळे हजारो वारकर्यांचा पंढरपूर प्रवास सुखकर आणि सुरक्षित झाला असल्याची माहिती विभागीय वाहतूक अधिकारी ज्योती गायकवाड यांनी दिली.
