सातारा : सातारा शहरवासीयांनी नेहमीच विकासकामांची पाठराखण केली आहे. सातारकरांच्या सहकार्याने या शहराचा चेहरामोहरा बदलता आला. आगामी काळातही ही विकासगंगा कायम राहण्यासाठी जनता भाजपसोबत राहिल. शहरवासिय यावेळी भाजपचे नगराध्यक्षपदाचे उमेदवार अमोल मोहिते यांनाच संधी देतील, असा विश्वास सार्वजनिक बांधकाम मंत्री ना. शिवेंद्रराजे भोसले यांनी व्यक्त केला. ठिकठिकाणच्या पदयात्रांना नागरिकांचा उत्स्फूर्त प्रतिसाद मिळत असल्याचेही त्यांनी सांगितले.
भाजप नगराध्यक्षपदाचे उमेदवार अमोल मोहिते व नगरसेवक पदाच्या उमेदवारांच्या प्रचारार्थ आयोजित पदयात्रेदरम्यान ना. शिवेंद्रराजे भोसले यांनी नागरिकांशी संवाद साधला. यावेळी नगराध्यक्षपदाचे उमेदवार अमोल मोहिते व पदाधिकारी उपस्थित होते.
ना. शिवेंद्रराजे म्हणाले, अमोल मोहिते हे सर्वसमावेशक नेतृत्व आहे. शहरात सर्वत्र त्यांचे चांगले नेटवर्क आहे. त्यामुळे जेथे जाईल तेथील मतदार त्यांना साथ देत आहेत. आम्ही जनतेसाठी 24 तास उपलब्ध असतो. सातारकर नागरिकांचे सर्वप्रकारचे प्रश्न सोडवण्यासाठी खा. उदयनराजे भोसले आणि मी, दोघेही नेहमीच प्राधान्य देतो. निवडणूक ही केवळ एक प्रक्रिया आहे. सातारकर नेहमीच आमच्या पाठीशी भक्कमपणे उभे राहिले आहेत, त्यामुळे सातारकर भाजपच्या नगराध्यक्ष पदाच्या उमेदवारांसह सर्व उमेदवारांना साथ देतील, यात तिळमात्र शंका नाही.
विरोधकांकडे सांगण्यासारखे काहीही नाही त्यामुळे ते जनतेची दिशाभूल करण्याचा प्रयत्न करत आहेत. त्यांच्या भूलथापांना सुज्ञ सातारकर कधीही भुलणार नाहीत, असा विश्वासही ना. शिवेंद्रराजे यांनी व्यक्त केला.
अमोल मोहिते म्हणाले, ना. शिवेंद्रराजे भोसले व खा. उदयनराजे भोसले यांच्यामुळे साताऱ्यात झपाट्याने विकासकामे मार्गी लागली. त्यांचे हात बळकट करण्यासाठी व सातारकरांच्या सर्वांगीण विकासासाठी मला साथ द्या. शहरवासियांच्या अपेक्षा पूर्ण करण्यासाठी मी स्वत: सातत्याने प्रयत्नशील आहे. भविष्यातही दोन्ही राजेंच्या मार्गदर्शनाखाली साताऱ्याच्या विकासासाठी कटिबद्ध असल्याची ग्वाही अमोल मोहिते यांनी दिली.
दरम्यान, पदयात्रेत सर्व आजी माजी पदाधिकारी, सर्व आजी माजी नगरसेवक, असंख्य कार्यकर्ते आणि नागरिक सहभागी झाले. ठिकठिकाणी नागरिकांनी ना. शिवेंद्रराजे व अमोल मोहिते यांचे स्वागत केले.
