सातारा : नाफेडच्या माध्यमातून कांदा खरेदीला गती देण्याचा निर्णय राज्य सरकारने घेतला असून मुख्यमंत्री यांनी सातारा दौऱ्यात शेतकऱ्यांना दिलासा देणारी घोषणा केली. नाफेडमार्फत प्रति किलो 12 रुपये 35 पैसे दराने कांदा खरेदी सुरु करण्यात आली असून बाजारभाव घसरल्याने अडचणीत सापडलेल्या कांदा उत्पादकांना यामुळे मोठा आधार मिळणार आहे. कांदा खरेदीसाठी ई-समृद्धी पोर्टलवर शेतकऱ्यांची नोंदणी सुरु करण्यात आली आहे.
राज्यातील विविध बाजार समित्यांमध्ये हमीभावाने कांदा खरेदी सुरु असून हजारो शेतकऱ्यांनी नोंदणी केली आहे. बाजारभाव कोसळल्यामुळे होणारे नुकसान कमी होणार असून व्यापाऱ्यांकडून कमी दर मिळण्यापेक्षा हमीभावाचा पर्याय उपलब्ध झाल्याने शेतकऱ्यांच्या खात्यावर थेट पैसे जमा होणार आहेत. कांदा बाजारातील दर स्थिर ठेवण्यास मदत होणार आहे. सातारा जिल्ह्यासह पश्चिम महाराष्ट्रातील कांदा उत्पादक शेतकऱ्यांमध्ये या निर्णयामुळे समाधानाचे वातावरण आहे.
मागील काही महिन्यांपासून उत्पादन खर्च वाढला असताना बाजारात कमी दर मिळत असल्याने शेतकरी आर्थिक संकटात होते. अशा परिस्थितीत नाफेड खरेदीमुळे शेतकऱ्यांना काही प्रमाणात दिलासा मिळणार असल्याची भावना व्यक्त होत आहे.
