सातारा : सातार्यातील चार वॉर्डमध्ये टाकण्यात येणार्या गॅस पाईपलाईनच्या खोदकामपोटी भारत पेट्रोलियम कॉर्पोरेशन लिमिटेड, सांगली (बीपीसीएल) या गॅस कंपनीने सातारा पालिकेच्या खजिन्यात ३.५ कोटींची रक्कम भरली. दै. 'पुढारी'ने याप्रकरणात झालेल्या घोटाळ्याचे वृत्त प्रसिद्ध केल्यानंतर नगर पालिका वर्तुळात खळबळ माजली होती. त्यानंतर संबंधित कंपनीला उपरती झाली.
सातार्यातील प्रभाग क्र. २, ३, १६ आणि १७ या चार प्रभागांमध्ये पाईपलाईनद्वारे गॅस पुरवठा करण्यासाठी सुमारे २२ कि.मी. खोदकाम करण्यात येणार आहे. या खोदकामामुळे रस्त्यांची प्रचंड हानी होणार आहे. सातारा पालिकेने शहरातील बहुतांश रस्त्यांची कामे केली आहेत. असे असतानाच पुन्हा रस्ते खोदले तर रस्त्यांच्या कामावर खर्च केलेली कोट्यवधींची रक्कम वाया जाणार असून त्यातच कंपनीकडूनही खोदकामाचे पैसे न भरल्याने नगरपालिकेला दुहेरी नुकसान सहन करावे लागणार होते.
पूर्वी तयार केलेले रस्ते गॅस पाईपलाईनसाठी पुन्ह खोदावे लागणार असल्याने कंपनीकडून नुकसानीची रक्कम भरून घेणे अपेक्षित होते. मात्र, या रक्कमेबाबत संभ्रमावस्था निर्माण झाली. संबंधित कंपनीने ही रक्कम भरल्याचे मुख्याधिकार्यांकडून सांगितले जात असताना नगरपालिकेच्या खजिना विभागात मात्र ही रक्कम जमा झाली नसल्याचे स्पष्ट झाले. त्यामुळे ही कोट्यवधींची रक्कम गेली कुठे? असा सवाल उपस्थित झाला.
मुख्याधिकार्यांचे पोकळ दावे, पालिकेचा रिकामा खजिना व कोट्यवधींचा महसूल बुडवण्याचा हा प्रकार दै. 'पुढारी'ने उघडकीस आणल्यानंतर सातार्यात खळबळ माजली. सातत्यापूर्ण व निर्भीड वृत्तांकनामुळे पालिका प्रशासनावर प्रचंड दबाव निर्माण झाला. नगराध्यक्ष, उपनगराध्यक्ष व इतर पदाधिकार्यांनी या प्रकरणाची गंभीर दखल घेतली. या प्रकरणात लोकप्रतिनिधी व नागरिकांकडूनही जाब विचारला जाऊ लागला. अखेर पालिका प्रशासनाने बीपीसीएलकडून ३.५ कोटी वसूल करून पालिकेच्या खजिन्यात जमा केले.
