सातारा : फलटण येथील उपजिल्हा रुग्णालयाच्या वैद्यकीय अधीक्षक डॉ. लीला मदने यांना शासनाने निलंबित केले. त्यांच्या प्रशासकीय कार्यकाळात रुग्णालयातील गैरव्यवस्थापन, कनिष्ठ वैद्यकीय अधिकारी व कर्मचाऱ्यांशी कठोर संवाद, तसेच कार्यालयीन वेळेबाहेर शस्त्र परवाना व वैद्यकीय प्रमाणपत्रांशी संबंधित प्रकरणे हाताळल्याच्या बाबी चौकशीत निदर्शनास आल्या आहेत. निलंबनाच्या कालावधीत डॉ. मदने यांचे मुख्यालय सोलापूर जिल्हा रुग्णालयात राहणार आहे.
वैद्यकीय अधीक्षकांच्या दालनात कर्तव्यावर असलेल्या अधिकाऱ्याशी बाहेरील व्यक्तींनी धक्काबुक्की व गैरवर्तन केल्याप्रकरणी फलटण शहर पोलिस ठाण्यात तक्रार दाखल झाली. या प्रकरणासह चौकशी समितीच्या निष्कर्षांच्या आधारे रुग्णालय प्रशासनातील नियंत्रणाचा अभाव व गैरव्यवस्थापन स्पष्ट झाल्याचे आदेशात नमूद केले. जबाबदार वर्ग-१ राजपत्रित अधिकारी म्हणून डॉ. मदने यांचे वर्तन अशोभनीय असून, महाराष्ट्र नागरी सेवा (वर्तणूक) नियम, १९७९ मधील तरतुदींचा भंग झाल्याचे नमूद करत सक्षम प्राधिकाऱ्यांनी नागरी सेवा (शिस्त व अपील) नियम, १९७९ मधील नियम ४ (१) (अ) अन्वये त्यांना आदेशाच्या दिनांकापासून पुढील आदेशापर्यंत निलंबित केले.
