सातारा : डॉ. संपदा मुंडे यांच्या आत्महत्येनंतर अनेक सवाल उपस्थित झाले असतानाच त्यांच्या मृत्यूनंतर व्हॉटस्ॲपवर 11.13 चे लास्ट सीन दिसत आहे. मृत्यूनंतरही मोबाईल सुरू असल्याने व तो हाताळला गेला असल्याच्या शक्यतेने काथ्याकूट झाला आहे. मोबाईलमधील सर्व डाटा हा रिकव्हर होऊ शकतो, यामुळे मोबाईलसोबत छेडछाड झाली असल्यास तसेही तपासात समोर यावे, अशी मागणी होत आहे. दरम्यान, या प्रकरणातील संशयित फौजदार गोपाळ बदने याने लपवलेला मोबाईल पोलिसांनी जप्त केला आहे.
डॉ. संपदा मुंडे या फलटण येथील उपजिल्हा रुग्णालय येथे मेडिकल ऑफिसर म्हणून कार्यरत होत्या. फलटण येथील बनकर यांच्याकडे भाड्याच्या खोलीत राहत होत्या. दि. 23 ऑक्टोबर रोजी पहाटे 1.30 वाजता त्यांनी फलटण येथीलच मधुदीप हॉटेलमधील रूम घेतली. रूममध्ये गेल्यानंतर त्या परत बाहेर आल्याच नाहीत. दि. 23 ऑक्टोबर रोजी दिवसभर त्या बाहेर आल्या नसल्याने हॉटेल प्रशासनाने सायंकाळी 7.15 वाजता डुप्लीकेट चावीने दरवाजा उघडला असता त्यांनी गळफास घेतल्याचे समोर आले. पोलिसांनी घटनास्थळी भेट दिल्यानंतर डॉ. संपदा यांच्या हातावर मृत्यूचे कारण लिहिल्याचे व त्यावर फौजदार गोपाळ बदने व प्रशांत बनकर हे जबाबदार असल्याचे नमूद होते. यामुळे संपूर्ण महाराष्ट्र हादरुन गेला.
गेली आठ दिवस दररोज या प्रकरणात अनेक घडामोडी वेगाने घडत आहेत. पोलिसांनी आतापर्यंत फौजदार गोपाळ बदने व प्रशांत बनकर या दोघांना अटक केली आहे. आता डॉ. संपदाच्या मोबाईलमधील व्हॉट्सअपवरील लास्ट सीन मृत्यूनंतरही व मोबाईल सापडल्यानंतर ते चार तासानंतरचे असल्याने कुटुंबियांनी गंभीर आरोप केले आहेत. याशिवाय समाजमाध्यमांवर देखील त्यावरुन काथ्याकूट सुरु आहेत. यामुळे सर्व खरी माहिती समोर आली पाहिजे, ही जनभावना तयार झाली आहे.
या प्रकरणात डॉ. संपदाच्या मृत्यूनंतर मोबाईल हाताळला गेल्याचा संशय व्यक्त होत आहे. तो संशय रास्त आहे असे गृहीत धरले जावेच. मृत्यूनंतर मोबाईलची छेडछाड झाली असल्यास त्या मोबाईलचा सर्व डाटा रिकव्हर होणे गरजेचे आहे. तांत्रिकदृष्ट्या तसा डाटा रिकव्हर करता येतो.
