साखरवाडी : फलटण उपजिल्हा रुग्णालयातील महिला वैद्यकीय अधिकारी मृत्यूप्रकरणात पोलिसांनी मोठी कारवाई करत संशयित प्रशांत बनकर याला शनिवारी बेड्या ठोकल्या; तर दुसरा संशयित आरोपी पोलिस उपनिरीक्षक गोपाळ बदने हा अद्याप फरारी आहे. त्याचा शोध घेण्यासाठी दोन स्वतंत्र पथके रवाना करण्यात आली आहेत.
फलटण शहरातील एका नामांकित हॉटेलमध्ये महिला डॉक्टरने गळफास घेऊन जीवन संपवले. या घटनेनंतर संपूर्ण फलटणसह राज्यभरात खळबळ उडाली होती. महिला डॉक्टरने आपल्याच हातावर कारण लिहिले होते. त्यामध्ये फौजदार गोपाळ बदने याने चारवेळा बलात्कार केल्याचे, तसेच घरमालक प्रशांत बनकर याने शारीरिक आणि मानसिक छळ केल्याचे नमूद केले होते. या घटनेची माहिती मिळताच पोलिसांनी तत्काळ तपासाची चक्रे वेगाने फिरवली. प्रशांत बनकर याला शनिवारी विशेष पथकाने अटक केली. दरम्यान, दुसरा आरोपी फौजदार गोपाळ बदने याचा अजूनही थांगपत्ता लागलेला नाही. मात्र मुख्यमंत्री देवेंद्र फडणवीस यांच्या आदेशानंतर त्याला निलंबित करण्यात आले आहे.
दरम्यान, या आत्महत्येच्या प्रकरणानंतर राज्यभरातून तीव्र प्रतिक्रिया उमटत आहेत. विरोधकांनी सरकार आणि प्रशासनावर कडक टीका करत पीडितेच्या कुटुंबीयांना न्याय मिळावा, अशी मागणी केली आहे. पोलिस विभाग आणि आरोग्य विभागाच्या निष्काळजीपणावर प्रश्नचिन्ह उपस्थित केले जात आहे.
