सातारा : राज्यातील ट्रिगर-१ आणि ट्रिगर-२ लागू झालेल्या एकूण ३०४ तालुक्यांना अंतिमतः दुष्काळग्रस्त घोषित करण्यात आले आहे. यामध्ये सातारा जिल्ह्यातील सर्व ११ तालुक्यांचा समावेश झाला असून या तालुक्यांमध्ये दुष्काळी उपाययोजना आणि विविध सवलती लागू करण्यात येणार आहेत. तसेच पिकांच्या नुकसानीचे पंचनामे तातडीने सुरू करण्याचे निर्देश जिल्हाधिकाऱ्यांना देण्यात आले आहेत, अशी माहिती मदत व पुर्नवसन मंत्री मकरंद पाटील यांनी दिली.
शासनातर्फे यापूर्वी ट्रिगर-१ लागू झालेल्या २६५ तालुक्यांना दुष्काळग्रस्त घोषित करण्यात आले होते. यामध्ये जिल्ह्यातील सातारा, माण, खटाव, महाबळेश्वर, फलटण, खंडाळा या तालुक्यांचा समावेश होता. मात्र वाई, कोरेगाव, जावली, पाटण, कराड यांचा समावेश नव्हता. दुष्काळग्रस्त शेतकऱ्यांचा यासाठी पाठपुरावा सुरू होता. मदत व पुनर्वसन विभागाच्या नवीन अध्यादेशानुसार ट्रिगर-२ च्या आधारे आणखी ३९ तालुक्यांचा नव्याने समावेश केल्याने एकूण ३०४ तालुके अंतिमतः दुष्काळग्रस्त घोषित करण्यात आले आहेत.
या नवीन दुष्काळग्रस्त तालुक्यांच्या यादीमध्ये यादीत वाई, कोरेगाव, कराड, पाटण या तालुक्यांचा समावेश केला असून या दुष्काळग्रस्त तालुक्यांमध्ये १२ उपाययोजना व सवलती लागू करण्याचा शासन निर्णय झाला असल्याचे ना. मकरंद पाटील यांनी सांगितले.
याचा लाभ सातारा जिल्ह्यातील ११ तालुक्यांतील दुष्काळग्रस्त शेतकऱ्यांना होणार आहे. जमीन महसुलात सूट, पीक कर्जाचे पुनर्गठन, शेतीशी संबंधित कर्जवसुलीस स्थगिती, कृषी पंपांच्या चालू वीजबिलात सूट आणि शालेय व महाविद्यालयीन विद्यार्थ्यांच्या परीक्षा शुल्कात माफी यांचा समावेश आहे. जलसंधारणाची कामे सुरू करणे आणि पिण्याचे पाणी व जनावरांच्या पाण्याचे योग्य नियोजन करणे, अशा उपाययोजना करण्यात येणार असल्याचे ना. पाटील म्हणाले.
