सातारा : सातारा जिल्हा रुग्णालय येथे नव्याने होत असलेल्या कॅथलॅबसाठी आवश्यक असणारी उद्वाहक यंत्रणा, विद्युत पुरवठा या कामासाठी राज्याचे सार्वजनिक बांधकाम मंत्री शिवेंद्रराजे भोसले यांच्या प्रयत्नातून 71 लाख 58 हजार 535 रुपये निधीला मंजुरी मिळाली आहे. त्यामुळे सुसज्ज कॅथलॅब लवकरच सुरू होऊन सातार्यातच रुग्णांवर मोफत हृदय शस्त्रक्रिया होणार आहे. ना. शिवेंद्रराजे हृदय रुग्णांसाठी आरोग्यदूत ठरले असून रुग्णांसह नातेवाईकांना दिलासा मिळणार आहे.
सार्वजनिक बांधकाम मंत्री शिवेंद्राजे भोंसले यांच्या प्रयत्नातून सातारा जिल्हा रुग्णालय येथे हृदय रुग्णांसाठी आवश्यक असणारी कॅथलॅब सुविधा मंजूर झाली होती. जिल्हा रुग्णालय येथे कॅथलॅब स्थापन करण्यासाठी बांधकाम सुरु आहे. याचा वेळोवेळी आढावा ना. शिवेंद्रराजे भोसले यांचेकडून सातत्याने घेतला जात आहे. या कॅथलॅब निर्मितीमुळे सातारा जिल्ह्यातील गरीब व गरजू हृदय रुग्णांना मोफत व दर्जेदार उपचार मिळण्याची सुविधा उपलब्ध होणार आहे. त्यामुळे हृदय रुग्णांना उपचाराकरता पुणे, मुंबई अथवा अन्य ठिकाणी जावे लागणार नाही.
जिल्ह्यातच आता अत्याधुनिक सोयीसुविधा उपलब्ध झाल्यामुळे जिल्हावासीयांना मोठा दिलासा मिळणार आहे. या महत्त्वाकांक्षी प्रकल्पामुळे जिल्ह्यातील आरोग्य सुविधांना नवा आयाम मिळेल व गोरगरीब गरजू रुग्णांना दिलासा मिळेल, असा विश्वास मंत्री शिवेंद्रराजे भोसले यांनी व्यक्त केला आहे.
सुसज्ज कॅथलॅबमध्ये हृदय रुग्णांकरता बाह्यरुग्ण सेवा तसेच ईसीजी, टु-डी ईको व हृदय रुग्णांकरता आवश्यक असणार्या सर्व चाचण्या तसेच अॅन्जीओग्राफी, अॅन्जीओप्लास्टी व बायपास सर्जरी आदी सुविधा मोफत उपलब्ध होणार आहेत. याचबरोबर हृदय रुग्णांकरता आवश्यक असणार्या अत्याधुनिक सोयी सुविधांनीयुक्त असे 10 बेडचा अतिदक्षता विभागही लवकरच सुरू करण्यात येणार आहे.
