कण्हेर : कण्हेर परिसरात बुधवारी वादळी वाऱ्यासह जोरदार अवकाळी पावसाने हजेरी लावली. या पावसावेळी कोंडवे ता. सातारा येथील चोरगेमळा शिवारातील धनगरांच्या बकऱ्यांच्या कळपावर वीज पडली.
यामध्ये हणमंत बापू मासाळ (रा. पळसावडे, ता. माण) या मेंढपाळाच्या 11बकरी व 7 मेंढ्या ठार झाल्या. या मृत्युमुखी पडलेल्या मेंढ्यांचा घटनास्थळी सभापती महेश गाडे, तलाठी गणेश बोबडे व पशुसंवर्धन विभागाचे अधिकारी दाखल झाले. या घटनेचा पंचनामा महसूल व पशुसंवर्धन विभागाकडून करण्यात आला आहे.
या मेंढपाळास नैसर्गिक आपत्ती या घटनेखाली सुधारित दाराप्रमाणे नुकसान भरपाई लवकरच मदत देण्याचे आश्वासन सभापती यांनी दिले. या अपघातात चार ते पाच शेळ्या गंभीर जखमी झाल्याने त्यांच्यावर पशुसंवर्धन विभागाच्यावतीने उपचार करण्यात आले. जोरदार अवकाळी पावसामुळे छोटी मोठी झाडे पडून ऊसांची पिके ही काही प्रमाणात भुईसपाट झाली आहेत.
