सातारा : यंदाचा प्रजासत्ताक दिन दिमाखदार साजरा व्हावा. यानिमित्त सांस्कृतिक कार्यक्रमासह शासन आपल्या दारी, मुख्यमंत्री माझी लाडकी बहीण योजना या सारख्या योजनांच्या लाभार्थ्यांची माहिती चित्ररथावर दर्शवण्यात यावी. प्रजासत्ताकदिनी चित्ररथ प्रजासत्ताक दिनाच्या ध्वजारोहण समारंभातील संचलनाबरोबर शहरातही फिरवावेत. यासाठी प्रशासकीय विभागाने समन्वयाने नियोजन करावे, अशा सूचना पालकमंत्री शंभूराज देसाई यांनी दिल्या.
प्रजासत्ताक दिन नियोजन आढावा बैठक पालकमंत्री शंभूराज देसाई यांनी दूरद़ृष्य प्रणालीद्वारे घेतली. या बैठकीला जिल्हाधिकारी संतोष पाटील, मुख्य कार्यकारी अधिकारी याशनी नागराजन, पोलिस अधीक्षक समीर शेख, अप्पर जिल्हाधिकारी जीवन गलांडे, निवासी उपजिल्हाधिकारी नागेश पाटील, पालकमंत्री यांचे विशेष कार्य अधिकारी सुनील गाढे यांच्यासह विविध विभागांचे अधिकारी उपस्थित होते.
पालकमंत्री देसाई म्हणाले, शासन आपल्या दारी उपक्रमाची सर्व प्रथम जिल्ह्यात सुरुवात करून या उपक्रमांतर्गत 29 हजार नागरिकांना थेट लाभ देण्यात आला होता. मुख्यमंत्री माझी लाडकी बहिण योजनेत एकट्या जिल्ह्यात 8 लाखापेक्षा अधिक लाभार्थ्यांना लाभ देऊन सातारा जिल्ह्यात उत्तम कामकाज करण्यात आले आहे. दि. 26 जानेवारीला या दोन्ही योजनांवर आधारित चित्ररथ तयार करावा. या चित्ररथावर तालुकानिहाय लाभार्थ्यांची ठळक आकडेवारी द्यावी. तसेच मुनावळे येथे वॉटर स्पोर्ट सुरु झाले आहे. त्याचे फोटो असणाराही चित्ररथ तयार करावा. कृषी व जिल्हा परिषदेनेही आपल्या विभागाशी संबंधित बांबू रोपण व इतर महत्वाच्या विषयाशी संबंधित चित्ररथ तयार करावेत. या चित्ररथांचे प्रजासत्ताकदिनी संचलन झाल्यानंतर हे चित्ररथ नागरिकांना पाहण्यासाठी सातारा शहरात देखील फिरवावेत. शासकीय इमारतींसह शिवतिर्थ, राजवाडा अशा महत्वाच्या ठिकाणी विद्युत रोषणाई करावी. प्रजासत्ताक दिनी होणार्या मुख्य शासकीय ध्वजारोहणानंतर सांस्कृतिक कार्यक्रमाचेही आयोजन करावे. शासकीय योजना सामान्य नागरिकांपर्यंत पोहचवण्यात सातारा जिल्हा अग्रेसर राहिला आहे. यापुढेही अशाच पद्धतीने काम करा, अशा सूचना ना. शंभूराज देसाई यांनी प्रशासनाला केल्या.
