सातारा : सातारा जिल्ह्यातील सर्वाधिक खपाचे, प्रथम क्रमांकाचे, सर्वांत प्रभावशाली व जिल्ह्यातील जनतेचे लाडके वृत्तपत्र असलेल्या ‘पुढारी’चा गुरुवार, दि. 1 जानेवारी रोजी 87 वा वर्धापनदिन साजरा होत आहे. त्यानिमित्ताने होत असलेल्या ‘पुढारी’ वर्धापनदिन स्नेहमेळाव्याचा रंगारंग माहोल तयार झाला असून जिल्ह्यावासियांना त्याचे प्रचंड औत्सुक्य लागून राहिले आहे. गोडोलीतील हॉटेल लेक व्ह्यूच्या संस्कृती लॉनवर सायंकाळी 6 ते 8 या कालावधीत हा स्नेहमेळावा होणार आहे. यावेळी ‘पुढारी’वर भरभरुन प्रेम करणाऱ्या स्नेहीजणांची ताला-सुरांच्या गट्टीत आगळी-वेगळी मैफील रंगणार आहे.
‘नववर्षाचे स्वागत, ‘पुढारी’ सोबत’ हे वर्षानुवर्षाचे समीकरण यंदाही कायम राहणार आहे. वाचकांच्या आशीर्वादाच्या भावबळावर दै. ‘पुढारी’ आज गुरुवारी 88 व्या वर्षात पदार्पण करत आहे. नव्या वर्षाचे स्वागत करण्यासाठी दि. 1 जानेवारी 2026 या पहिल्याच दिवशी सायंकाळी 6 ते 8 यावेळेत राजधानी साताऱ्यातील ऐतिहासिक गोडोली तलावानजिक हॉटेल लेक व्ह्यूच्या संस्कृती लॉनवर हा स्नेहमेळा होत आहे. तत्पूर्वी दै.‘पुढारी’ सातारा कार्यालयात सकाळी दै. ‘पुढारी’चे संस्थापक, ‘पुढारी’कार पद्मश्री डॉ. ग. गो. जाधव यांच्या प्रतिमेस पुष्पहार अर्पण करून अभिवादन करण्यात येणार आहे.
दरम्यान, सायंकाळी संस्कृती लॉनवर होणाऱ्या स्नेहमेळाव्याला लोकप्रतिनिधी, अधिकारी, विविध क्षेत्रातील मान्यवर, वाचक, विक्रेते, जाहिरातदार आणि हितचिंतक आवर्जुन उपस्थित राहणार आहेत. नववर्षाची पहिली सायंकाळ व ‘पुढारी’चा वर्धापनदिन हा अनोखा क्षण साजरा करण्यासाठी या स्नेहमेळाव्याला उपस्थित रहावे, असे आवाहन ‘पुढारी’ परिवाराने केले आहे. दरम्यान, या निमित्त दै. पुढारी कराड कार्यालयातही दै. ‘पुढारी’चे संस्थापक, ‘पुढारी’कार पद्मश्री डॉ. ग. गो. जाधव यांच्या प्रतिमेस पुष्पहार अर्पण करून अभिवादन करण्यात येणार आहे. दुपारी 1 वाजता मान्यवरांच्या उपस्थितीत हा कार्यक्रम होईल.
