प्रतापगड : ढोल-ताशांचा गजर, छत्रपती शिवाजी महाराजांचा जयघोष, शिंग-तुताऱ्या व झांजांचा आवाज आणि रोमांच उभा करणारा माहोल अशा भारावलेल्या वातावरणात किल्ले प्रतापगडावर हेलिकॉप्टरमधून छत्रपती शिवाजी महाराजांच्या अश्वारूढ पुतळ्यावर शिवप्रतापदिनी पुष्पवृष्टी करण्यात आली. यानिमित्ताने शिवप्रेमींच्या अलोट गर्दीत किल्ल्यावर शिवकालीन धाडशी खेळांचे अंगावर शहारे आणणारी प्रात्यक्षिके सादर करण्यात आली.
शिवप्रताप दिनासाठी किल्ले प्रतापगड सजला होता. गुरुवारी सकाळी जिल्हाधिकारी संतोष पाटील, मुख्य कार्यकारी अधिकारी याशनी नागराजन, पोलिस अधीक्षक तुषार दोशी, उपवनसंरक्षक अमोल सातपुते, सहायक उपवनसंरक्षक प्रदीप रौंदळ यांच्या हस्ते आई भवानी मातेची महापूजा करण्यात आली. भवानी मातेच्या मंदिरासमोर ध्वजस्तंभाचे विधिवत पूजन करण्यात आले. त्यानंतर शिवशाहीचे प्रतीक असणाऱ्या भगव्या ध्वजाचे रोहण कुंभरोशीचे सरपंच कांचन सावंत, उपसरपंच ज्योती जंगम यांच्या हस्ते करण्यात आले. त्यावेळी ढोल, तुताऱ्या, लेझीम यांच्या गजराने परिसर दुमदुमून गेला.
पालखीचे शिवरायांच्या अश्वारुढ पुतळ्याजवळ आगमन झाल्यावर पुतळ्यास व पालखीस पुष्प अर्पण करुन भक्तिभावे पूजन करण्यात आले. यावेळी ‘क्षत्रिय कुलावतंस, राजाधिराज’ या ललकारींने व शिवरायांच्या जयजयकाराच्या घोषणांनी वातावरण भारुन गेले होते. मान्यवरांच्या हस्ते शिवपुतळ्यासमोरील चबुतऱ्यावरील भगव्याचे ध्वजारोहण करण्यात आले. यानंतर सातारा पोलीस दलाच्या बॅण्ड पथकाने विविध धून वाजवून मानवंदना दिली. शाहीर सुरज जाधव आणि सहकाऱ्यांनी प्रतापगडचा रणसंग्राम हा जोशपूर्ण पोवाडा सादर केला.
छावा युवा मंचचे अध्यक्ष उदय यादव यांनी विद्यार्थ्यांसह लाठी काठी, तलवारबाजी, दांडपट्टा, कुऱ्हाडबाजी, अग्निचक्र, गनिमी कावा आदी ऐतिहासिक खेळांची डोळ्यांचे पारणे फेडणारी प्रात्यक्षिके सादर केली.
वनव्यवस्थापन समिती प्रतापगड यांच्यामार्फत येणाऱ्या शिवभक्तांना अल्पोपहार सोय करण्यात आली होती तसेच महाबळेश्वर नगरपालिका यांच्यावतीने महाप्रसाद देण्यात आला. समिती मार्फत संपूर्ण किल्याची स्वच्छता करण्यात आली. यावेळी शिवप्रताप वाद्यपथक यांनी ढोल वादन करुन वातावरण शिवमय केले.
यावेळी वाईचे प्रांताधिकारी योगेश खरमाटे, उपविभागीय पोलिस अधिकारी सुनील साळूंखे, तहसीलदार सचिन मस्के, वनक्षेत्रपाल महादेव मोहिते, पोनि बापू सांडभोर, कार्यकारी अभियंता मोहसीन मोदी, उप अभियंता अजय देशपांडे, गटविकास अधिकारी विजयकुमार विभुते, मुख्याधिकारी योगेश पाटील, शिक्षणाधिकारी प्राथमिक शबनम मुजावर, आबा ढोबळे यांच्यासह ग्रामस्थ व विद्यार्थी उपस्थित होते.
