सातारा : महाराष्ट्र राज्य कुस्तीगीर परिषद ही राज्यातील सर्वांत जुनी संघटना आहे. दोन वर्षांपूर्वी संघटनेची मान्यता आणि राजकारणाच्या घेर्यात अडकलेल्या या संघटनेची निवडणूक आणि वैधतेबाबत प्रश्न निर्माण झाले होते. महाराष्ट्र कुस्तीगीर संघ खरा की महाराष्ट्र कुस्तीगिर परिषद वैध याचा वाद थेट कोर्टात पोचला होता. अखेर महाराष्ट्र कुस्तीगीर परिषदेच्या बोर्डाची निवडणूक झाली. यामध्ये आ. रोहित पवार यांची अध्यक्ष म्हणून बिनविरोध निवड झाली आणि कुस्तीच्या आखाड्यातही पवारांचीच पॉवर आहे हे सिद्ध झाले.
महाराष्ट्र राज्य कुस्तीगीर परिषदेची स्थापना स्व. मामासाहेब मोहोळ, माजी मुख्यमंत्री स्व. यशवंतराव चव्हाण, लोकनेते स्व. बाळासाहेब देसाई, भाऊसाहेब हिरे यांनी पैलवानांच्या हितासाठी केली. महाराष्ट्र राज्य कुस्तीगीर संघ यांच्यातील वादात कुस्ती क्षेत्र बदमान झाले. सुमारे दीड वर्ष यांच्या वादात पैलवानांचे मोठे नुकसान झाले. महाराष्ट्र राज्य कुस्तीगीर परिषदेवर खर्या संघटनेचा शिक्का बसला असला तरी परिषदेतील अंतर्गत वाद पेटला आहे. खा. शरद पवार यांनी परिषदेचे सरचिटणीस लांडगे यांचे काही दिवसांपूर्वी निलंबन केले आहे. पै. बाळासाहेब लांडगे यांनी दि. 27 जूनला परिषदेच्या निवडणुकीची 14 ते 16 जुलै ही तारीख जाहीर केली. त्यातच तत्पूर्वीच खा. शरद पवार यांनी दि. 25 जूनला परिषदेच्या निवडणुकीचा कार्यक्रम जाहीर केला. त्यानुसार दि. 26 व 27 जुलैला निवडणूक झाली. परिषदेच्या अंतर्गत अस्वस्थतेचे चित्र जिल्हा संघटनांसाठी धक्कादायक ठरले आहे.
स्व. मामासाहेब मोहोळ यांनी सन 1953 साली महाराष्ट्र राज्य कुस्तीगिर परिषदेची मुहूर्तमेढ रोवली आणि ज्येष्ठ नेते शरद पवार हे गेली चाळीस वर्षे ‘महाराष्ट्र कुस्तीगिर परिषदेचे अध्यक्ष म्हणून काम करत होते. स्व. यशवंतराव चव्हाण यांच्या विचारांनी चालणार्या या संघटनेच्या माध्यमातून राज्यातील अनेक पैलवानांनी आतापर्यंत राज्य, राष्ट्रीय आणि आंतरराष्ट्रीय पातळीवर नावलौकिक प्राप्त केला आहे. विविध पदके प्राप्त केलेल्या अनेक गुणवान पैलवानांना शासनामध्ये चांगल्या पदावर नोकर्या मिळाल्या आहेत.
शरद पवार यांचे हेच काम पुढे घेऊन जाण्याची जबाबदारी आता त्यांचेच नातू आ. रोहित पवार यांच्यावर आली आहे. क्रिकेटमध्ये त्यांनी ज्याप्रमाणे एमपीएलचा यशस्वी प्रयोग करुन राज्यातील होतकरु क्रिकेट खेळाडूंना हक्काचे व्यासपीठ मिळवून दिले. त्याचप्रमाणे आता कुस्तीमध्ये ते कोणता प्रयोग करतात, याकडे राज्याच्या तमाम कुस्ती क्षेत्राचे लक्ष लागले आहे. आ. रोहित पवार हे महाराष्ट्र क्रिकेट संघटनेचे अध्यक्ष म्हणूनही कामकाज पाहत आहेत. त्यांच्या कार्यकाळात त्यांनी आयपीएलच्या धर्तीवर सलग तीन वेळा एमपीएल यशस्वीपणे भरवून राज्याच्या कानाकोपर्यातील क्रिकेट खेळाडूंना हक्काचे व्यासपीठ उपलब्ध करुन दिले.
तसेच गेल्यावर्षी अहिल्यानगर येथे महाराष्ट्र क्रिकेट संघाच्या माध्यमातून भरवण्यात आलेल्या ‘महाराष्ट्र केसरी’ कुस्ती स्पर्धेत वाद झाल्याने आणि या स्पर्धेच्या एकूणच वैधतेबाबत प्रश्नचिन्ह निर्माण झाल्याने आ. रोहित पवार यांनी ‘महाराष्ट्र राज्य कुस्तीगिर परिषदेच्या मान्यतेने कर्जत येथे 66 वी महाराष्ट्र केसरी कुस्ती स्पर्धा यशस्वीरित्या भरवली होती. आता तर त्यांनी कुस्तीगिर परिषदेच्या संघटनेच्या सर्वोच्च पदावर मजल मारत बिनविरोध अध्यक्षपदी निवड झाली आहे.
