पाटण : महाराष्ट्राची वरदायिनी मानल्या जाणाऱ्या कोयना धरण पाणलोट क्षेत्रात पावसाच्या हलक्या व मध्यम सरी कोसळत आहेत. त्यामुळे धरणात प्रतिसेकंद १४ हजार ८ क्युसेक पाण्याची आवक होत आहे. या पार्श्वभूमीवर धरणाची संपुष्टात येत असलेली पाणी साठवण क्षमता लक्षात घेत धरणाचे सर्व ६ वक्र दरवाजे २ फुटापर्यत उचलण्यात आले आहेत.
कोयना धरणात ९७.०७ टीएमसी इतका पाणीसाठा झाला असून धरण पूर्ण क्षमतेने भरण्यासाठी आता केवळ ८ टीएमसी पाण्याची गरज आहे. त्यामुळे वक्र दरवाजे १ फुटावरून २ फुटापर्यत उचलून प्रतिसेकंद १५ हजार ५८ क्युसेक पाण्याचा विसर्ग सुरू आहे. त्याचवेळी पायथा वीजगृहातून प्रतिसेकंद १ हजार ५० क्युसेक पाण्याचा विसर्ग सुरू आहे.
त्यामुळे कोयना नदीत एकूण प्रतिसेकंद १५ हजार ५८ क्युसेक पाण्याचा विसर्ग सुरू आहे. त्यामुळे नदीच्या पाणी पातळीत वाढ होत आहे. १ जूनपासून आत्तापर्यंत कोयना ३६६१ मिलिमीटर, नवजा ४७९३ मिलिमीटर, महाबळेश्वर ४७९३ मिलिमीटर पावसाची नोंद झाली आहे.
