पाटण : महाराष्ट्राची वरदायिनी असलेल्या कोयना धरण परिसराला सोमवारी मध्यरात्री १२.३० ते मंगळवारी पहाटे ४ या कालावधीत भूकंपाचे पाच सौम्य धक्के बसले. रिश्टर स्केलवर या धक्क्यांची तीव्रता २.१ ते २.५ इतकी नोंदली गेली. धक्क्यांची तीव्रता कमी असल्याने ते नागरिकांना जाणवले नाहीत.
मध्यरात्री १२.३० वाजण्याच्या सुमारास २.१ तीव्रतेचा पहिला धक्का नोंदविण्यात आला. त्यानंतर १.३० वाजता २.३ तीव्रतेचा दुसरा धक्का बसला. ३.१५ वाजता २.२, त्यानंतर अवघ्या १५ मिनिटांनी २.५ आणि पहाटे ४ वाजता २.१ तीव्रतेचा पाचवा धक्का नोंदविण्यात आला. या सर्व भूकंपांचे केंद्र सातार्यापासून सुमारे ५० ते ५२ किलोमीटर अंतरावर असल्याचे सांगण्यात आले. मंगळवारी रात्री बसलेल्या धक्क्यांमुळे कोयना धरण किंवा परिसरातील कोणत्याही बांधकामाला हानी झालेली नाही. पाटण तालुक्यातही कुठेही पडझड झाल्याचे वृत्त नाही. दरम्यान, ऐन गणेशोत्सवात एकाच रात्री पाच धक्के बसल्याची माहिती समोर आल्याने परिसरातील नागरिकांमध्ये काही काळ भीतीचे वातावरण निर्माण झाले.
