कराड : यात्रेवेळी फलक व डीजे लावण्याच्या कारणावरून दोन गटांत जोरदार धुमश्चक्री उडाल्याची घटना कोरेगाव (ता. कराड) येथे शनिवारी रात्री घडली. याप्रकरणी तालुका पोलिस ठाण्यात परस्परविरोधी तक्रारी दाखल करण्यात आल्या असून 14 जणांविरुद्ध गुन्हा दाखल करण्यात आला आहे.
अक्षय अरुण सावंत याने दिलेल्या फिर्यादीवरून, सूरज दळवी, ओंकार सावंत, सिद्धार्थ पाटील, ओमसाई सावंत, शंभू सावंत, ऋषिकेश सावंत (सर्व रा. कोरेगाव) यांच्यावर गुन्हा नोंदविण्यात आला आहे. यात्रेवेळी शाळेजवळ बॅनर लावण्याच्या कारणावरून संशयितांनी हाताने व लाथाबुक्क्यांनी मारहाण करत ठार मारण्याची धमकी दिल्याचे अक्षय याने पोलिसांना दिलेल्या तक्रारीत म्हटले आहे. लाकडी दांडक्याने मारहाण केल्यामुळे अक्षय सावंत हे जखमी झाले आहेत.
सूरज विलास दळवी याने ऋषीकेश ऊर्फ अक्षय अरुण सावंत, पंकज सावंत, उदय सावंत, अरुण सावंत, अविनाश सावंत, भानुदास सावंत, जालिंदर सावंत यांच्यासह अन्य एकाविरुद्ध तक्रार दिली असून या सर्वांवर गुन्हा नोंद करण्यात आला आहे. यात्रेत डीजे लावायचा नाही असे का म्हणतोयस, असे म्हणून संशयितांनी शिवीगाळ, दमदाटी करून कोयत्याच्या मुठीने मारहाण केल्याचे सुरज दळवी याने तक्रारीत म्हटले आहे. आपल्या आत्या व मामा यांनाही लाकडी दांडक्याने मारहाण केल्याचे सुरजने फिर्यादीत म्हटले आहे. याप्रकरणी आठ जणांवर गुन्हा दाखल करण्यात केला आहे.
