सातारा-स्वारगेट मार्गावर ई-शिवाई बस : 85 बसची महामंडळाकडे मागणी
सातारा; पुढारी वृत्तसेवा : महाराष्ट्र राज्य मार्ग परिवहन महामंडळाचा 1 जून रोजी वर्धापनदिन होत असून, राज्यातील पहिली एसटी पुणे-अहमदनगर मार्गावर धावली होती. याच मार्गावर पहिली विद्युत ई-शिवाई बस सोडण्याचे नियोजन महामंडळाने केले आहे. दरम्यान, सातारा विभागाने सातारा-स्वारगेट मार्गावर ई-शिवाई बसची मागणी महामंडळाकडे केली आहे. त्यामुळे प्रवाशांचे लक्ष ई-शिवाई बसकडे लागले आहेत.
माहिती तंत्रज्ञानाच्या जमान्यात एसटी महामंडळानेही पाऊल टाकण्यास सुरुवात केली आहे. राज्य शासनाने पर्यावरणपूरक धोरण राबवण्याच्या अनुषंगाने इलेक्ट्रिक वाहन धोरण लागू केले आहे. ई-बाईक्स व ई-वाहने यांना मोटार वाहन करातून 100 टक्के सूट देण्यात आली आहे. तसेच दिवसेंदिवस पेट्रोल व डिझेलचे दर वाढत चालले आहेत. त्यामुळे नागरिकांचा कल ई-बाईक्स व ई-वाहने खरेदी करण्याकडे वाढला आहे. पुणे महानगर परिवहन महामंडळाप्रमाणे (पीएमपी) आता महाराष्ट्र राज्य मार्ग परिवहन महामंडळातर्फे इलेक्ट्रिक बस सेवा सुरु केली जाणार आहे. राज्यातील पहिली बस पुणे-नगर मार्गावर 1948 मध्ये धावली होती. त्यामुळे दि. 1 जून रोजी एसटी महामंडळाची पहिली ई-बस पुन्हा पुणे-नगर मार्गावर धावणार आहे. त्यामुळे एसटी महामंडळाच्या सातारा विभागाने सातार्‍यासाठी सुमारे 85 ई-शिवाई बसची मागणी महामंडळाकडे केली असल्याचे समजते. ई-शिवाई बस सातारा-स्वारगेट मार्गावर धावणार असल्याचे बोलले जात आहे. शिवाय ग्रामीण भागातील जास्त उत्पन्न देणार्‍या जवळच्या मार्गावर ई-बस सोडण्याचे नियोजन सातारा विभागाने केले आहे.
ई-शिवाई बस अत्याधुनिक असून त्यात सीसीटीव्ही कॅमेरे, चालकाच्या आसनाशेजारी छोटा एलईडी, आरामदायी आसनव्यवस्था अशा विविध सोयी सुविधा आहेत. शिवाई बस वातानुकूलित असल्याने पूर्ण चार्जिंगमध्ये ई-बस सुमारे 200 ते 250 किलोमीटर धावू शकते, असा दावा महामंडळाने केला आहे. प्रदुषणाविना चालणार्‍या या बस अधिक सुरक्षित आणि चांगला प्रवासाचा अनुभव प्रवाशांना देणार आहेत.
पुणे-नगर मार्गावर ई-शिवाई बसला कसा प्रतिसाद मिळतोय याचा आढावा घेतल्यानंतर राज्यातील इतर मार्गावर ई-शिवाई बसचा विस्तार वाढवण्याचे नियोजन महामंडळाचे आहे. मात्र सातारा विभागाने ई-शिवाई बसची मागणी केली असून महामंडळामार्फत त्याला हिरवा कंदील कधी मिळणार त्यासाठी संबंधित विभाग ई-शिवाई बससाठी चार्जिंग पाईंट कधी व कोठे उभारणार? असे विविध प्रश्न या निमित्ताने उपस्थित होत आहेत. त्यामुळे सातारा विभागात ई-शिवाई बस कधी दाखल होणार याकडे जिल्ह्यातील प्रवाशांचे लक्ष लागून राहिले आहे.
