सातारा : जिल्ह्यातील 703 वीज चोरांवर कारवाई | पुढारी

सातारा : जिल्ह्यातील 703 वीज चोरांवर कारवाई

सातारा : पुढारी वृत्तसेवा

गेल्या चार दिवसांमध्ये महावितरणने वीज चोरी करणार्‍या आकडेबहाद्दरांविरुद्ध विशेष मोहिमेद्वारे कठोर कारवाईला सुरुवात केली आहे. यामध्ये पुणे, सोलापूर, सांगली, सातारा व कोल्हापूर जिल्ह्यांमध्ये अनधिकृत वीजजोडणीचे 7 हजार 220 आकडे काढून टाकण्यात आले असून त्यासाठी वापरलेले पंप, केबल व स्टार्टर आदी साहित्य देखील जप्त केले आहे. यात सातारा जिल्ह्यातील 703 जणांचा समावेश आहे.

सध्या उन्हाच्या झळा दिवसेंदिवस वाढत असल्याने विजेच्या मागणीत देखील मोठी वाढ झाली आहे. मागणीप्रमाणे विजेचा पुरवठा करण्यासाठी हे अनधिकृत आकडे अडथळे ठरत असल्याने वीज चोरीविरुद्ध विशेष मोहीम सुरु करण्यात आली आहे. यात गेल्या चार दिवसांमध्ये 7 हजार 220 ठिकाणी अनधिकृत आकडे टाकून वीजचोरी सुरु असल्याचे दिसून आले. हे आकडे तात्काळ काढून टाकण्यासोबतच त्यासाठी वापरण्यात आलेले केबल, पंप, स्टार्टर व इतर साहित्य जप्त करण्यात आले आहे. या धडक कारवाईमध्ये सातारा जिल्हा 703, सोलापूर 3 हजार 21, कोल्हापूर 35, सांगली 457 आणि पुणे 573 आणि बारामती ग्रामीण मंडलमध्ये 2431 आकडे आढळून आले. ते ताबडतोब काढून टाकण्यात आले आहेत. यातील वीजचोरीचे बहुतांश आकडे हे कृषी वापरासाठी असल्याचे आढळले आहे.

पश्चिम महाराष्ट्रात गेल्या वर्षभरापासून वीज चोरीविरुद्ध नियमित कारवाईसह विशेष एक दिवसीय मोहीम सुरु करण्यात आली आहे. या विशेष मोहिमांमध्ये आतापर्यंत पुणे, सातारा, सांगली, सोलापूर, कोल्हापूर जिल्ह्यांमध्ये 6 हजार 428 ठिकाणी 7 कोटी 71 लाख 45 हजार रुपयांच्या अनधिकृत वीज वापराचा पर्दाफाश करण्यात आला आहे. इतर ठिकाणाहून आकडे किंवा केबल टाकून चोरीद्वारे वीज वापर करताना स्वतःच्या, घरातील लहान-मोठ्या व्यक्तीच्या किंवा परिसरातील नागरिकांच्या जीवाला धोका निर्माण होऊ शकतो. जीवघेणा अपघाताची शक्यता असते. त्यामुळे विजेची चोरी करण्याऐवजी अधिकृत वीजजोडणी घ्यावी, असे आवाहन महावितरणकडून करण्यात आले आहे.

Back to top button