सातारा : 'काशिनाथाचं चांगभलं'च्या गजरात बावधनची बगाड यात्रा उत्साहात, पहा व्हिडिओ
वाई : पुढारी वृत्तसेवा : संपूर्ण राज्यात वैशिष्ट्यपूर्ण मानली जाणारी बावधन येथील ऐतिहासिक व पारंपरिक बगाड यात्रा मंगळवारी (दि.२२) काशीनाथाचं चांगभलं’ च्या गजरात लाखो भाविकांच्या उपस्थितीत उत्साहात पार पडली. बावधन येथील भैरवनाथाचे बगाड गावाच्या पूर्वेस सुमारे ५ किलोमीटर अंतरावरील सोनेश्‍वर याठिकाणी सकाळी आठच्या सुमारास पोहचले. त्यानंतर बगाड्या बाळासाहेब मांढरे यांना कृष्णा नदीत विधीवत स्नान घालण्यात आले. त्यानंतर देवदेवतांची विधिवत पूजा-आरती करण्यात आली. बगाड्याला वाजत गाजत बगाडाजवळ नेण्यात येवून त्याला पारंपरिक पध्दतीचा पोषाख घालून बगाडास टांगण्यात आले. यावेळी भाविकांनी नोटांची व नारळाची तोरणे, झेंडे, नवसाचे गोंडे बगाडास बांधण्यात आले होते.
बगाडाचा गाडा ओढण्यास सकाळी अकराच्या सुमारास सुरूवात झाली. त्यानंतर ठिकठिकाणी विसावा घेऊन बैल बदलण्यात आले. बगाडाबरोबर वाघजाईदेवी, भैरवनाथ आणि जोतिबाच्या पालख्यांचेही भाविकांनी दर्शन घेतले. बगाड वाई-पाचवड रस्त्यावर बावधन फाटयावर दोनच्या सुमारास पोहचले. तेथे रस्त्याच्या दुतर्फा हॉटेल, मिठाई, खेळणी, थंडपेयांची व फळांची दुकाने, रसाची गुर्‍हाळे, देवांच्या फ्रेमची, कटलरीची दुकाने थाटण्यात आली होती. वाई व परिसरातील हजारो भाविकांनी बगाड पाहण्याचा आनंद लुटला व दर्शन घेतले.
बगाड गाड्यास शेतातून जाताना एका वेळी १२ बैल जुंपले जात होते. कच्च्या रस्त्यावर आल्यानंतर ४ बैल जुंपून बगाड ओढण्यात आले. ग्रामस्थांनी बगाडासाठी बैल धष्टपुष्ट केले होते, यासाठी शेतकर्‍यांनी संपूर्ण वर्षभर आपल्या बैलांची निगा राखून त्यांना खुराक देवून तयार केले होते. हे खिलारी बैल पाहण्यासाठी शेतकरी लोक लांबून येत असतात. गाडा गावाच्या दिशेने जात असताना ठिकठिकाणी शिडाच्या पाच फेर्‍या काढण्यात आल्या. बगाड परिसरात मुंबईच्या व स्थानिक विविध संस्था, मंडळांनी भाविकांच्या सोईसाठी पिण्याच्या पाण्याची सोय केली होती. वाई व बावधन प्राथमिक आरोग्य केंद्राचे पथक व १०८ रूग्णवाहिका तैनात करण्यात आली होती. वाई विभागाची महावितरणची टीम जातीने लक्ष ठेवून होती. वाई नगरपरिषदेचे अग्निशमक बंब बावधन हायस्कूल येथे सज्ज ठेवण्यात आले होते. सायंकाळी सहा वाजण्याच्या सुमारास बगाड गावात पोहचले. यावेळी वाद्यांचा गजर करण्यात आला.
बगाड यात्रेवर नियंत्रण ठेवण्यासाठी बगाड गाडयाच्या पुढे व पाठीमागे ट्रॅक्टरवर लाउडस्पीकरची सोय करून शशिकांत पिसाळ, दिलीप पिसाळ, राजू कदम, पोलीस पाटील अशोक भोसले, मदन भोसले, विलास पिसाळ, प्रतापराजे भोसले आदी मान्यवर ध्वनिक्षेपकावरून बगाडाबाबत सुचना देत होते. अनेक भाविकांनी दिलेल्या देगण्यांचा पुकारा यावेळी करण्यात येत होता. तसेच कोणताही अनुचित प्रकार होऊ नये, म्हणून भाविकांनाही सुचना देण्यात येत होत्या. पोलीस उपअधीक्षक शीतल जानवे-खराडे, वाईचे पोलीस निरीक्षक बाळासाहेब भरणे, उपनिरीक्षक-विजय शिर्के यांच्या मार्गदर्शनाखाली ४ उपनिरीक्षक, ६० पोलीस कर्मचारी, १ जलद कृतीदलाची तुकडी तैनात करून पोलीस बंदोबस्त चोख ठेवण्यात आला होता. दरम्यान, बावधन बगाडाच्या उत्सवात कोणताही अनुचित प्रकार घडला नाही.
हेही वाचलंत का ?
- Lalu Prasad Yadav : लालू प्रसाद यादव यांची तब्येत बिघडली, दिल्लीला नेण्याची तयारी
- Kareena Kapoor Video : फिटनेस फ्रीक करिनाने बिर्याणीवर मारला ताव
- पश्‍चिम बंगालमध्‍ये राजकीय संघर्षातून सात जणांना जिवंत जाळले!
पहा व्हिडिओ : ‘झुंड’ मधून नागराज मंजुळेंना नेमकं काय सांगायचं आहे ? : नागराज मंजुळेंशी खास गप्पा | jhund movie