विटा : विट्यातील एमडी ड्रग्ज कारखाना प्रकरणात दिवसेंदिवस नवनवीन माहिती मिळत आहे. आता तर यात थेट सावकारी कनेक्शन असल्याचे बोलले जात आहे.विट्यातला मेफेड्रॉन (एमडी) या ड्रग्जच्या कारखान्यावर स्थानिक गुन्हे अन्वेषण विभागाच्या पथकाने छापा टाकून कारवाई केली. या घटनेला आता आठवडा उलटून गेला. एका महिलेसह एकूण सात जण याप्रकरणी अटकेत आहेत. त्यांना दहा जानेवारीपर्यंत पोलिस कोठडी देण्यात आली आहे. मात्र अद्यापही या ड्रग फॅक्टरीचा मालक नेमका कोण? यामागे कुणी स्थानिक बिल्डर, उद्योगपती अगर कोण कोण राजकीय शक्ती आहेत? याबाबत पोलिसांकडून कसून तपास सुरू आहे.
आता नव्याने जी माहिती मिळाली आहे, त्यात ज्या विट्याजवळील कार्वे औद्योगिक वसाहतीत प्लॉट नंबर 43 वरच्या रामकृष्ण हरी माऊली इंडस्ट्रीज हा एमडी ड्रग तयार करायचा कारखाना होता, त्या कारखान्याची एक मालक असलेली गोकुळा विठ्ठल पाटील ही विट्यातील महिला जिल्हा स्थानिक अन्वेषण विभागाच्या अटकेत आहे. मात्र तो कारखाना मुळात महाराष्ट्र औद्योगिक विकास महामंडळाकडे वेगळ्याच मालकाच्या नावाने नोंदणीकृत आहे. ज्या नावाने प्लॉट नंबर 43 वरच्या रामकृष्ण हरी माऊली इंडस्ट्रीज हा खिळे, मोळे आणि पुठ्ठे बनवण्याचा हा कारखाना आहे, त्या मूळ मालकाने कारखाना सुरू करण्यासाठी विट्यातील काही जणांकडून काही लाख रक्कम व्याजाने घेतली होती. तो ती रक्कम व्याजासह ठरलेल्या वेळेत परत करू शकला नाही. त्यातून व्याजावर व्याज चक्रवाढ व्याजाने किंबहुना त्याहीपेक्षा जास्त व्याजाची रक्कम गेली आणि जवळजवळ संपूर्ण कारखानाच संबंधित खासगी सावकारांच्या ताब्यात गेला, अशी चर्चा लोकांत सुरू आहे. त्यामुळे या ड्रग कारखाना तपासात खासगी सावकारीचेही कनेक्शन आहे, तेही तपासातून पुढे यावे अशी मागणी विटेकर करीत आहेत.
आतापर्यंत जिल्ह्यात काही ठिकाणी ड्रग्जचे साठे सापडत होते. त्यावर कारवाई होऊन संबंधित प्रकरण न्यायालयापर्यंत जाऊन पुन्हा चार-आठ दिवसात शांत होत असे. कारण, ज्या लोकांवर कारवाई केली जायची, असे लोक जामिनावर बाहेर सुटलेले असायचे आणि त्यांचे खटले वर्षानुवषे चालायचे. परंतु विट्यामध्ये चक्क एमडी ड्रग्ज बनवायचा कारखाना सापडला. हा कारखाना नेमका कोणाचा, पैसे कोणी, कोणी लावलेत, हे शोधणे महत्त्वाचे आहे.
