ईश्वरपूर : गेल्या काही वर्षांपासून साखर कारखानदारी अत्यंत कठीण टप्प्यातून जात आहे. यंदा दुष्काळाचे सावट आणि उसाच्या टंचाईमुळे राज्यभरातील अनेक कारखाने ६० ते ९० दिवस चालण्याची शक्यता आहे. मात्र, अशा आव्हानात्मक परिस्थितीतही सभासद, कामगार आणि 'कृष्णा' परिवाराला सोबत घेऊन शिस्त व पारदर्शक कारभाराच्या बळावर कारखाना यशाची परंपरा कायम राखेल, असा विश्वास अध्यक्ष डॉ. सुरेश भोसले यांनी व्यक्त केला.
रेठरे बुद्रुक (ता. कराड) येथील यशवंतराव मोहिते कृष्णा सहकारी साखर कारखान्याच्या ६७ व्या गाळप हंगामाच्या बॉयलर अग्निप्रदीपन सोहळ्यात ते बोलत होते. डॉ. सुरेश भोसले व उत्तरा भोसले यांच्याहस्ते बॉयलरचे पूजन करून अग्निप्रदीपन करण्यात आले.
व्यवस्थापकीय संचालक बाजीराव सुतार यांनी स्वागत केले. या सोहळ्यास कृष्णा विश्वविद्यापीठाचे विश्वस्त विनायक भोसले, कराड पंचायत समितीच्या सभापती नंदा यादव, जिल्हा परिषद सदस्या शैलजा शिंदे, प्रियांका साळुंखे, माजी जिल्हा परिषद सदस्य जितेंद्र पाटील, प्रदीप पाटील, शिवाजी पाटील, संजय पाटील उपस्थित होते.
