शिराळा : नागपंचमी उत्सवाला लाभलेली धार्मिक आणि सांस्कृतिक परंपरा कायम राखताना, डीजे तसेच अश्लील व बीभत्स नृत्यप्रकारांना तातडीने आळा घालावा, अशी जोरदार मागणी करत शिराळ्यातील महिलांनी अत्यंत संतप्त प्रतिक्रिया व्यक्त केल्या. 'नागपंचमीचे गाव' म्हणून ओळख सांगताना अशा अश्लील प्रकारांमुळे मान खाली घालावी लागते, अशा शब्दांत महिलांनी आपली खंत व्यक्त केली.
येथील दत्त मंदिर हॉलमध्ये 'जय जिजाऊ महिला नागराज मंडळा'च्यावतीने आयोजित बैठकीत महिलांनी ही आक्रमक भूमिका मांडली. याप्रसंगी अश्विनी कदम, नेहा सूर्यवंशी, सुनंदा सोनटक्के, जिल्हा परिषद सदस्या राजेश्वरी नाईक, अनिता धस, वैशाली नाईक, डॉ. कृष्णा जाधव, नम्रता नाईक, सीमा पाटील, सीमा कदम, सुरेखा गायकवाड आदी प्रमुख उपस्थित होत्या. ज्येष्ठ नागरिक संघटनेचे वसंतराव यादव, सर्जेराव गायकवाड, नगरसेवक महेश खंडागळे, प्रा. ॲड. सम्राट शिंदे, डॉ. नितीन जाधव यांनीही महिलांच्या भूमिकेला पूर्ण पाठिंबा दर्शवला.
बैठकीत महिला म्हणाल्या, "आतापर्यंत डीजेचा कर्णकर्कश आवाज सहन केला; मात्र यावर्षी झालेले बीभत्स प्रकार यापुढे सहन करणार नाही. डीजेच्या आवाजामुळे ज्येष्ठ नागरिकांना दोन-दोन दिवस घर सोडून बाहेर जावे लागते, तर लहान मुलांवर चुकीचे संस्कार होत आहेत.
