कडेगाव शहर : राष्ट्रवादी काँग्रेस शरदचंद्र पवार पक्षाचे नेते, क्रांती साखर कारखान्याचे अध्यक्ष शरद लाड भाजपात प्रवेश करणार आहेत. 7 ऑक्टोबररोजी मुंबईत लाड यांचा पालकमंत्री चंद्रकांत पाटील, पक्षाचे प्रदेशाध्यक्ष रवींद्र चव्हाण यांच्यासह दिग्गज मंत्री आणि नेत्यांच्या उपस्थितीत हा प्रवेश होणार असल्याचे खात्रीशीर वृत्त आहे. त्यामुळे पलूस-कडेगाव मतदारसंघात राष्ट्रवादी शरदचंद्र पवार पक्षाला धक्का बसणार आहे.
शरद लाड हे जिल्हा परिषदेचे माजी सदस्य आहेत. त्यांनी पलूस-कडेगाव मतदारसंघात राष्ट्रवादी काँग्रेस पक्षाच्या वाढीस चालना दिली होती. एकंदरित पलूस-कडेगाव मतदारसंघात राष्ट्रवादीचे मूळ रोवण्यात त्यांना यश मिळाले होते. मात्र आता शरद लाड भाजपमध्ये प्रवेश करणार असल्याची माहिती समोर आली आहे. मुंबई येथे 7 ऑक्टोबररोजी दिग्गज मंत्री आणि नेते मंडळींच्या उपस्थितीत त्यांचा भाजपात पक्षप्रवेश होणार आहे. शरद लाड यांच्या प्रवेशामुळे जिल्ह्यात भाजपची ताकद वाढण्यास आणखी मदत होणार आहे. दुसरीकडे पलूस-कडेगाव मतदारसंघातील राजकीय समीकरणे बदलणार आहेत. दरम्यान, शरद लाड यांनी याबाबत अधिकृत कोणतीही माहिती दिली नसली तरी त्यांचा पक्षप्रवेश निश्चित असल्याची माहिती समोर येत आहे.
