वळसंग : वळसंग येथे सालाबादप्रमाणे यंदाही श्री मायाक्कादेवी पालखी भेट सोहळा मोठ्या उत्साहात व भक्तिमय वातावरणात पार पडला. सुमारे एक हजार महिलांसह हजारो भाविकांच्या उपस्थितीने सोहळ्याला भव्य स्वरूप प्राप्त झाले. ढोलवादन, सनई-पिपाणीचा निनाद आणि पारंपरिक नृत्यामुळे संपूर्ण वळसंग नगरी भक्तिमय झाली होती.
विविध गावांतून आलेल्या श्री मायाक्कादेवीच्या पालख्यांची पारंपरिक पद्धतीने भेट घडवून आणण्यात आली. पालख्यांचे आगमन होताच ढोल-वादन, सनई-पिपाणीचे सूर आणि पारंपरिक नृत्याने वातावरणात उत्साह संचारला. ‘मायाक्कादेवीच्या नावाने चांगभलं’च्या जयघोषाने परिसर दुमदुमून गेला.
या सोहळ्यानिमित्त श्री मायाक्कादेवी समितीच्यावतीने भाविकांसाठी महाप्रसाद व पिण्याच्या पाण्याची व्यवस्था करण्यात आली होती. तसेच पारंपरिक ओवी व सांग सादर कर ण्यासाठी कलाकारांना बोलावण्यात आले होते. त्यामुळे धार्मिक सोहळ्यासोबतच पारंपरिक लोककलेचे दर्शनही भाविकांना घडले.
पालखी भेटीच्या वेळी मोठी गर्दी असूनही दर्शन, पालखी भेट व धार्मिक कार्यक्रम सुरळीतपणे पार पडले. भाविकांची गैरसोय होऊ नये यासाठी समितीचे पदाधिकारी, स्वयंसेवक व ग्रामस्थ दिवसभर कार्यरत होते.
