सांगली : सांगली जिल्ह्याच्या विविध भागांत सलग तिसऱ्या दिवशी अवकाळी पावसाने जोरदार हजेरी लावली. काही ठिकाणी झालेल्या गारपिटीमुळे काढणीला आलेली पिके पूर्णपणे उद्ध्वस्त झाली. बळीराजा पुन्हा एकदा संकटात सापडला आहे. शासनाने तातडीने पंचनामे करून भरपाई द्यावी, अशी मागणी केली जात आहे.
जिल्ह्यात गेल्या तीन दिवसांपासून वातावरणात मोठा बदल झाला आहे. गुरुवारी अनेक ठिकाणी विजांच्या कडकडाटासह आणि वादळी वाऱ्यासह पावसाने हजेरी लावली. यामुळे काढणीला आलेला गहू, हरभरा आणि ज्वारी या रब्बी पिकांचे अतोनात नुकसान झाले आहे. द्राक्ष बागांना या पावसाचा मोठा फटका बसला आहे. पालेभाज्या आणि इतर फळभाज्यांचेही नुकसान झाल्याने बाजारपेठेतील आवक आणि दरावर परिणाम होण्याची शक्यता आहे.
सांगली शहरात गुरुवारी दुपारपासूनच ढगाळ वातावरण होते. सायंकाळी सातच्या सुमारास शहरात तुरळक पाऊस पडला. कृषी आणि महसूल विभागाने विलंब न लावता तातडीने नुकसानीचे वस्तुनिष्ठ पंचनामे करावेत आणि विमा कंपन्यांकडून भरपाई मिळवून द्यावी, अशी मागणी होत आहे.
