सांगली : बचतगटाने घेतलेल्या टेंडरचे बिल मंजूर केल्याच्या मोबादल्यात 40 हजार रूपयांची लाच घेताना समाज कल्याण विभागाचे सहायक आयुक्त नितीन उषा संपत उबाळे (वय 46, रा. खरे क्लब हाऊसजवळ, विश्रामबाग, सांगली. मूळ रा. साखरवाडी, ता. फलटण) यांना रंगेहात पकडण्यात आले. सांगलीच्या लाचलुचपत प्रतिबंधक विभागाने ही कारवाई केली. या कारवाईने समाजकल्याण विभागात खळबळ उडाली आहे.
तक्रारदार यांचा बचतगट आहे. या बचतगटाने समाज कल्याण विभागाकडील एक टेंडर घेतले होते. त्याचे काम पूर्ण झाल्यानंतर बिल मंजूर केल्याच्या मोबादल्यात सहायक आयुक्त उबाळे याने त्यांच्याकडे 10 टक्क्यानुसार लाच मागितली. त्यामुळे तक्रारदार यांनी दि.16 रोजी लाचलुचपत प्रतिबंधक विभागाकडे तक्रार केली. लाचलुचपत प्रतिबंधक विभागाने तक्रारीची पडताळणी केली असता बचतगटाचे 8 लाख 12 हजार रूपये बिल मंजूर केल्याबद्दल दहा टक्केप्रमाणे लाचेची मागणी केल्याचे निष्पन्न झाले. त्यानंतर तडजोड अंती पाच टक्के प्रमाणे 40 हजार रूपये लाचेची मागणी केल्याचे पडताळणीत स्पष्ट झाले. उबाळे याने ही रक्कम दि. 17 रोजी घेऊन येण्यास सांगितले.
गुरूवारी दुपारी लाचलुचपत प्रतिबंधक विभागाने सहायक आयुक्त उबाळे याच्या कक्षाजवळ सापळा रचला. त्यानंतर तक्रारदार यांच्याकडून 40 हजार रूपये लाच स्विकारल्यानंतर उबाळे यांना रंगेहाथ पकडण्यात आले. त्यांना अटक करून त्याच्याविरूद्ध सांगली शहर पोलिस ठाण्यात भ्रष्टाचार प्रतिबंध अधिनियमानुसार सायंकाळी उशिरा गुन्हा दाखल करण्याची प्रक्रिया सुरू होती. लाचखोर उबाळे याला शुक्रवारी न्यायालयासमोर हजर केले जाणार आहे.
ही कारवाई लाचलुचपत प्रतिबंधक विभागाचे उपअधीक्षक उमेश पाटील, निरीक्षक किशोरकुमार खाडे, विनायक भिलारे, अंमलदार प्रीतम चौगुले, अजित पाटील, सलीम मकानदार, ऋषिकेश बडणीकर, पोपट पाटील, उमेश जाधव, धनंजय खाडे, सीमा माने, सुदर्शन पाटील, अतुल मोरे, चंद्रकांत जाधव, वीणा जाधव यांच्या पथकाने केली.
