शिराळा : शिवरवाडी (ता. शिराळा) येथे संबंध ठेवण्यास नकार दिल्याच्या रागातून एका 26 वर्षीय विवाहितेवर चाकूने हल्ला करण्यात आला. ही घटना शुक्रवार, दि. 17 एप्रिलरोजी सकाळी साडेअकरा वाजता येथील टेकाची वाट परिसरात घडली. याप्रकरणी शंकर श्रीपती बेंद्रे (रा. शिवरवाडी) याच्यावर शिराळा पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, पीडित महिला कचरा टाकण्यासाठी बाहेर गेली असताना संशयित शंकर बेंद्रे याने तिला गाठले. संबंध ठेवण्यास नकार दिल्याच्या रागातून त्याने पीडित महिलेवर चाकूने वार करून तिला गंभीर जखमी केले. हल्ल्यानंतर जखमी महिलेला तातडीने शिराळा येथील उपजिल्हा रुग्णालयात दाखल करण्यात आले. मात्र, प्रकृती गंभीर असल्याने तिला पुढील उपचारांसाठी ईश्वरपूर येथे हलवण्यात आले आहे. याप्रकरणी पीडित महिलेने दिलेल्या फिर्यादीवरून शंकर बेंद्रे याच्याविरोधात गुन्हा दाखल झाला आहे. हवालदार वैभव पाटील अधिक तपास करत आहेत.
